Barclays Premier League-a palina nih inchuha inumna a hmuhnawm zel a, hunrei tak Top 4 lo luahlum tawhtu Tottenham Hotspurs dinhmun a chhe deuh deuh zel. Thawhṭanni zanah Tottenham hian White Hart Lane-a an mikhual Norwich City an hneh lo a, palina ni turin an dinhmun a chiang lo tawh hle. He inkhelah hian Norwich City tân Anthony Pilkington leh Elliot Bennett ten an thun a, Spurs goal awmchhun hi Jermain Defoe thun a ni.

Team Lineups:

Tottenham Hotspurs: Friedel; Walker, King, Kaboul, Assou-Ekotto; Lennon, Modric, Livermore (Van der Vaart 71′), Bale; Saha (Adebayor 46′), Defoe.

Norwich City: Ruddy, Martin, Ward, R. Bennett, Drury; Johnson, Pilkington (Andrew Surman 73′), Wilbraham (Jackson 80′), Howson, E. Bennett; Holt (Morison 70′).

Inkhel chanchin:

Inkhel ṭantir lamah Tottenham in chance an nei hmasa a, mahse goal thun hmasatu chu Norwich City an ni. Minute 13 lekah Tottenham defender te chebuai laklawh aṭangin penalty box chhunga ball lo changtu Pilkington chuan a pêt goal. Norwich striker ‘form’ zet mai Grant Holt a hnawksak a, nidanga Tottenham tlarhnung tiphuisuitu ni ṭhin Ledley King a tibuai hneh ngei mai.

Norwich player te an tlanpeih a, Tottenham midfield-ah Luka Modric te ho an ‘free’ hleithei lo. A sir tawn tawna ‘winger’ tlanchak pahnihLennon leh Bale ten ball ṭha tak tak an cross chu field laia lo ‘finish’ tu an awm ṭhin tlat lo. Minute 33 ah Livermore through ball changtu Jermain Defoe chuan ‘mawi’ takin a pet goal.

Second half ah Adebayor chuan Saha thlakin, Tottenham in bul an ṭanfuh zawk a. Gareth Bale leh Assou-Ekotto ten an thun teuh hle. Mahse Norwich an bet rei lo a, khel ṭha em em Pilkington bakah Holt bawk hnawksak lehin, ani hian a teammate te tân chance ṭha tak tak a siamchhuahsak. Minute 63 ah Gareth Bale chuan goal bar hnuailam a pêt per bawk.

Tottenham in goal thun tuma an nawr ai mahin Norwich nawrlêt a hlauhawm zawk a. Minute 66 ah Elliot Bennett chuan penalty box pâwn aṭangin kawh zetin a pet goal. Tottenham defender ten an hnaihchilh har hret a tih theih awm e.

Huntâwp dawnah mual neitu lam hian nawrlet tum viau mahse, Norwich City players ten an hnaihchilh zung zung a, Spurs player te passing fuh loh ni a tih theih rualin, an passing chhiat chhan hi Norwich player te taimak leh tlanpeih vang a tih theih awm e. Adebayor-a’n penalty box chhunga Norwich player a tihtluk vanga penalty a chawi lo chu a vannei kher mai. Goal dang luhbelh loin hun a tâwp a, hei hi White Hart Lane-ah December 1993 hnulama Norwich City chak leh hmasak ber niin, tun season-ah, White Hart Lane-a Tottenham chak loh vawithumna a ni bawk. (Manchester United leh Manchester City te an lo hneh lo tawh).

Tottenham dinhmun

Tottenham hian vawi 33 khel tawhin point 59 an hmu mek a. Vawi 32 khelha point 56 hmu tawhtu Chelsea hian away-ah Fulham an hneh chuan Tottenham luahlanin palina an ni ang.  Newcastle United pawhin Champions League khelh an hnaih ve deuh deuh a, vawi 33 khelhah point 59 ve tho an hmu tawh.

Arsenal hian vawi 32 khel tawhin point 61 an hmu tawh a, pathumna an ni mek bawk. Anni pali zinga pahnih chauh hi Top 4 ah an leng dawn si a, palina nih inchuhna hi a na telh telh dawn a, a hmuhnawm telh telh bawk ang. Arsenal, Tottenham Hotspurs, Chelsea leh Newcastle United te zingah top 4 tura i rin pahnih han thlang teh le.

Statistics

Inkhel dang result

Newcastle United an chak leh tawh a, Sports Direct Arena-ah Bolton 2-0 in an hneh. He inkhelah hian tunlaia Premier League striker ‘form’ ber Papiss Cisse chuan a pet goal leh tawh. Everton in 4-0 in Sunderland an sawp bawk.

Newcastle United 2 – 0 Bolton
Newcastle: Hatem Ben Arfa 73′, Papiss Cisse 83′

Everton 4 – 0 Sunderland
Everton: Magaye Gueye 54′, Steven Pienaar 75′, Leon Osman 76′, Victor Anichebe 81′