Pathianni zana Premier League game pawimawhah pahnihna Manchester United in Ashley Young goal 2 leh Rooney goal 1 hmangin Tottenham Hotspurs 3-1 in an hneh a, an elpui Manchester City an umphak lohna chu point 2 chiah a ni leh ta. Tottenham goal hi Jermain Defoe thun a ni.

Manchester United an khel ṭha lo a, mahse khel ṭha lo chunga White Hart Lane-a point 3 hmuh theih hi ‘champion tur rau’  a ni thei angem? Manchester City an umphak phawt a la ngai e.

First half: A khel chhe zawkin goal an thun

Player pawimawh Rafael Van der Vaart, Gareth Bale leh Scott Parker te tel lova khel Tottenham hian a tir aṭangin inkhel an thunun zawk a, central midfield-ah player che rang Livermore leh Sandro ten English midfielder pahnih Paul Scholes leh Michael Carrick an dah nil. Tottenham tlarhma-ah Adebayor leh Saha te inkawp an hlauhawm thei hle a, a sir tawn tawnah Lennon leh Modric ten an nawr bawk a, an pali hian vawi duai lo Man United defence an ṭhiat thei, an finishing tawih tawk lo erawh a pawi.

Man United passing a fuh hleithei lova, Spurs fans te phur zual laiin, minute 37 ah Saha shot chu United goal line-ah Adebayor chuan lo dangin, mawi zetin a kheng goal a. Mahse ball a control na lamah a kut a hman avangin referee in goal ah a pawm lo.

Minute 45 ah Wayne Rooney chuan Ashley Young corner aṭangin a head goal a, khel chhe zawk Man United in hma an hruai der. He corner-a Rooney mark tu Walker a dem theih awm e. Half time a ni zui a, Spurs fans ten referee Martin Atkinson an ‘boo’ hluah hluah mai.

Second half-ah Ashley Young

Second half-ah pawh mual neitu in bul an ṭan ṭha a, dinglamah winger tlanchak Lennon a langsar hle. Tottenham hian goal hlauhawm tak tak pawh an nei nual a, mahse first half ang bawkin uihawm tak takin an ṭhelh zel a, de Gea chetṭhat ni a ni bawk nen, goal-ah an thun thei tlat lo.

Premier League-a pakhatna leh pathumna inkhel an ni a, chance ṭha pakhat hloh pawh a uihawm a, chance tamtak an hloh phei chu chaklohna hnâr pakhat a ni. Spurs pawhin an chance ṭha neih an thun thei lo a, United hremna chu na tak a ni.

Minute 60 ah Nani cross, Walker-a clear mumal loh chu Ashley Young chuan hnai angreng tak aṭangin a volley goal a. Minute 68 ah Young bawk hian penalty box pawn aṭangin mawi zetin a pet goal. Pet kual mawi ngaih ngaih tak a ni. Hunrei tak chhung inkhel thununtu zawkin si thum an phur a, commentator lam chuan ‘daylight robbery’ tiin an sawi vel!!!

Khel ṭha lo Paul Scholes thlaktu Ryan Giggs rawn luh hnuah United passing in awmzia a nei sawt a. Tottenham in Kranjcar luhtirin Modric chu a laiah pawtlut mahse, United in Rooney pawtletin midfield-ah an inhnawh tawh a, Jermain Defoe chuan minute 87 ah pet goal ve mahse awmzia a nei pha tawh lo. Inkhelh zawhah Spurs fans ten “Gareth Bale chu awm se” an ti ve vawng vawng ngei ang.

Team Line-ups

Tottenham: Friedel; Walker, Kaboul King Assou-Ekotto; Lennon (Rose 84′), Livermore, Sandro (Kranjcar), Modric; Adebayor, Saha (Jermain Defoe 80′)

Manchester United: De Gea; Jones, Ferdinand, Evans, Evra; Nani (Ji Sung Park), Carrick, Scholes (Giggs 61′), Young; Rooney, Welbeck

Inkhel zawh titi

* Manchester khaw club pahnihte inum rawn telpui a, Premier League title race-a tel pha ve hman zuai zuai Tottenham vawi 2 an chak lo zawn ta a, Arsenal in an sawp hnuah White Hart Lane-ah an an tlawm leh ta. Palina Arsenal nen an inthlauhna hi point 4 chiah a ni tawh a, pangana Chelsea nen point 7 in an inthlau mek. March ni 24 ah Stamford Bridge-ah Chelsea nen an inkhel dawn a, palina dinhmun hi a tawp dawn ruaiah an hloh thut mai angem?

* Wayne Rooney hian Tottenham Hotspurs laka a game hnuhnung 8 ah goal 7 a thun tawh.

*  Pakhatna ni mek Manchester City hian Arsenal, Chelsea leh Manchester United an la tum dawn a, pahnihna Man United hian ‘Manchester derby’ lo chu ‘big game’ tih tur an nei tawh lo. Premier League-ah game awlsam awm lo mahse game huphurhawm loh bik hi chu a awm chiang a, hetiang game hi Man United in an ngah tawh zawk.

* Tottenham Hotspurs hmatâwngte an khel ṭha a, an pet goal ngei ngei tur vawithum vel de Gea-a’n a lo dang. Man United defence hian tunhma a tluk tawh lo chiang a, Vidic leh Ferdinand te inkawp vanglai ngaihtuah chuan pui lo tak a ni. Chutihlaiin Man United goal thun zawng zawng kha Tottenham defender te ṭhat tawk loh vang a tih ve theih tho awm e.

* Defender te aiin forward te an khelh ṭhat zan a ni a, 4-4-2 formation hmanga attacking game khel ve ve an nih avangin goal mouth action a tam. Inkhel hmuhnawm a ni a, au na tur a tam a, team pahnih defence erawh ṭha tak han tih tur a ni lo ve ve. Stiker nei ṭha ve ve inkhel a nih vang pawh a ni mahna.

* Tottenham Hotspurs hian Man United hi an hneh thei lo ve hrim hrim a, May 2001 hnu khan a zawnin vawi 21 an hneh zo tawh lo a ni.