TRANSFER BAZAR LEH A KAIHHNAWIH – Ema Ralte

Player inlei leh inhralh chungchangah hian club leh club indawrna mai hi thenkhat chuan a tâwk emaw kan ti thin a. Mahse han zirchian a, han bihchian chuan a kaihhnawih thil tam tak a lo awm a, he’ng player insawnna atana thil pawimawh leh thil tul tih ngâi ang tlângpui te i han tarlang zuai zuai teh ang.

A BUL TANNA:
Club pakhatin club danga mi player duh zawng tak a lo nei a, chu player chinchang chu a khelhna club-ah te an han ngaihven hmasa phawt a. Chu an player enthlak chu chik taka an en hnu-ah an duh a nih chuan lehkha a ziakin a khelhna club-ah lei an duh thu official takin an thehlut tur a ni.

An lehkha thehluh chu club chuan uluk takin a lo ngaihtuah ang a, chumi hnu-ah official in lehkha hmang te leh hmaichhanah emaw club hruaitute an indawr ang. Player khelh mekna club hian chu player chu a man an chhiar ang a, tin, a contract lo sign tawh-ah buy-out-clause te a lo neih chuan chu chu a lei duhtu club ten an ngai pawimawh hmasa phawt tur a ni. Heti ang hunah hian player agent-te pawh club be tur hian phalna an pe thei bawk.

AN DAWRNA MAN CHU LO PAWM TA SE:
An indawrna te a tluang a, a (player) man tur chungchangah pawh club official te an inbe fel a nih pawhin ava dawrtu club-ah player hi a lut nghal thei tihna a ni lova, agent ten player aiawhin tihfel tur tam tak an la nei a. Player in agent a nei lo a nih chuan amahin a transfer chungchang a buaipui tur a ni a, a tul angin club official ten an pui ang. (Football player ah hian agent nei lo pawh an awm ve thin)

Agent chuan player in engzat nge a hlawh ang, engtia rei nge contract a ziah ang tih leh thil tam tak player aiawhin a ngaihtuah a ngai a, chutih rual chuan a lei tur club lamin thiam takin a hlawh tur chungchangah leh a contract rei lam tur te an han chhut leh ang a, sum engzat nge an sên dawn tih an chhut vek hnu-ah contract chungchang chu agent te an sawi pui dawn a ni.

Sum che vel a tam tham thin em avang hian a lei tur club pawhin an sên tlem theih dan tur ber an ngaihtuah a, player hlutna leh market (Player jersey hralh chungchangah leh thildang) ah an hlawk dawn nge dawn lo tih thleng te pawhin an ngaihtuah ve a ngai a, chumi hre rân chuan an player lei tum chu an dawr ta thin a ni.

Player leh club inkarah inremna a awm hian, thil ken tel tam tak a awm thin a. Chûng zinga pawimawh tak mai pakhat chu an (player te) hlawh tur chungchang hi a ni.

An player lei tum chu a tirah a phut zat an pe lo thei a, mahse chuti chung chuan an lalut thei thova. A chhan chu an inremnaah a leitu club chuan a khelh dan a zirin BONUS emaw, season khat a khelh hnu-ah a hlawh chu percentage eng emaw zatin an tipung ang tih emaw te in inremna an siam thin.

Player thenkhat chu a hma-a an khelhna club-a an hlawh aia tlem hlawh turte in club dangah an lut thin a, hetiangah pawh hian club leh player ten inremna tha tak an lo neih thin vang te a ni châwk thin.

SIGNING-ON FEE:
Player chuan a club thar chu a zawm dawn ta a, hetah hian ‘signing-on fee’ an tih chu player hian a dawng ve thin a. Hei hi league hrang hrangah tihdan a inang lova, a thenah chuan vawikhatah an inpe tla a, hmun thenkhatah erawh an inremna a zirin kum khat chhung ten an inpe tla thin. Signing-on-fee hi inpek ngei ngei tur tih dân erawh a awm lem lo niin a lang.

PLAYER IN A DAWN VE TUR:
Club leh player indawrna chungchangah hian player te hian hamthatna eng eng emaw an nei ve thin a, an inremna a zir zelin player in BONUS dawn tur an nei ve a, chung zinga a langsar zual te han tarlang ta ila –

Loyalty Bonus – Player in a club tana a contract ziah a hmang zo a nih chuan ‘Loyalty Bonus’ (Rinawmna Lawmman) hi pek a ni ang. He bonus hi a contract huam chhunga match hnuhnung ber a khelh zawhah pek tur a ni. Entirnan: Kum 3 daih contract a ziah a, chu a contract chu a hman zawh thak chuan he Loyalty Bonus hi a dawng dawn a ni.

Appearance Bonus – Sawi tawh angin club leh player te inremsiamna angin bonus hi player te pek an ni a, chung zingah chuan Appearance Bonus pawh hi a tel thin. He bonus hi player ten an ngai pawimawh hle a, player tha, world class player kan tih te phei chuan an ngai pawimawh hle a ni.

Club leh player inremna-ah player in match khatah £100 lo hlawh dawn ta se, chu pawh chu an inrem dan a zirin match a start chuan 100%, substitute atanga a lut anih chuan 50% emaw, a luh loh chuan 25% emaw player chuan a dawng ang.

Bonus dang awm leh thei chu a club luhna chuan European Competition/League/Cup ah lo champion ta se, chutiangah chuan an inrem dan a zirin player chuan bonus a dawng ang. Tin, an inremna-ah European Competition khel turin a club chu an qualify a nih chuan player chuan bonus a dawng bawk ang.

Heng bakah hian goal an thun emaw, eng award emaw an lak in emaw, goalkeeper tan goal an chhuah loh in emaw, ram tana an khelh phak in emaw an inrem dan a zir zelin player in club atangin bonus a hlawh bakah a dawng bawk dawn a ni.

Tin, player in reserve atanga professional a lut chho an nih chuan an professional match hmasaber club tana an khelh hunah emaw a hnu deuhah emaw bonus an dawng thin a. He’ng reserve atanga senior team a chho te hi professional match 5 an start hnu-ah chauh an contract chungchang an sawipui nawn thin a ni. Mahse hei hi club kalphung a zirin an thlak danglam thei bawk.

IMAGE RIGHTS OWNERSHIP:
Hei hi contract an ziah tur chungchangah chuan a pawimawh hle a. Player in a thlalak emaw, a âw emaw, ama kaihhnawih hrim hrim sumdawnna atan a phal leh phal loh chungchanga indawrna a ni a, player phalna thlap hi a khelhna club tur ten an la hmasa thin a ni.

MEDICAL:
Medical an neih meuh hi chuan a chunga kan han tarlan tak te khi player leh club ten an pawm thlap tawh hi a ni tlangpui thin a, mahse hmun thenkhatah chuan personal term leh contract an indawr hma hian player hriselna a that leh that loh a enfiah hmasa phawt thin a, chu player chu a hriselna a tha tih finfiah a nih veleh a hlawh tur chungchangte leh a contract kaihhnawih tur te an sawipui chauh thin.

Medical hi club stadium emaw, training ground ah emaw, damdawiin ah te neih thin a ni tlangpui a. Club tin ten medical lama mithiam an neih vek avang hian khawi hmunah pawh ti sela a theih vek a ni.

Player in a club thar tur a zawm dawna medical a neih dawn hian a club hlui atangin a medical report a keng tel tur a ni a, hetah hian a hliam lo neih tawhte an ngai pawimawh hle thin.

Hliam enkawl lai nei mek a nih chuan a hliam chu dam mai thei a ni em tih leh engti ang chen nge a club hlui lamin an lo enkawl tawh a, an lo buaipui tawh tihte report a awm tur a ni a. Hei hi a club zawm tur a medical lampang changtuten an han ennawn ve leh ang a, hliam lai mah ni se enkawl dam mai theih a nih chuan medical hi an paltlang tir mai ta thin a ni.

(Medical ah hian tling lo a awm theih a, player man tur chungchangah leh a hlawh tur ah pah inbiakfelna awm vek tawh mahse medical test an neih a, a club luhna turte lungawina zâna test a paltlang lo a nih chuan player lei duhtu club hian an indawrna an titawp thei)

INDAWRNA A FEL DAWN TA:
Club leh club inkarah engkim a fel tawh a, player leh club inkarah pawh engkim a fel hnu-ah an indawrna leh inremsiamna zawng zawngte chu a document nen fel takin an rama football-a thuneitu sangber hnenah an thehlut tur a ni.

Entirnan: England ah chuan F.A. hnuaiah an awm vek a, England chhungah player an in lei a nih chuan F.A. hnenah an document an thehlut tur a ni a, chuti ang ni lova England atanga France-ah emaw an insawn dawn a nih chuan F.A. in F.F.F. hnenah an document chu a thawn sak dawn a ni.

Heng document ah hian player man, a hlawh zat tur, bonus a dawn zat tur leh image rights ownership leh thildang a kaihhnawih zawng zawng an thiltel vek tur a ni.

An contract ziahna ringawt pawh hi a bu a siam tham lawih te hi a ni thin a. Kan lo hmuh thinah chuan lehkha phek tlemteah an hming an ziah mai thin a. Mahse an hming an ziahna bâkah hian an inremna zawng zawng kimchang taka an ziahna te nen hi chuan phek 40 chuang laite a ni thin a ni.

(Tunhnaiah football thuneitu sângin transfer thil avangin club hrem an nei nual a, heng an hrem zinga țhenkhat hi chu document an thehluh ah player man chungchangah te thudik tawk lo an thehlut țhin. Entirnan – FC Barcelona pawhin Neymar Jr. an lakluh danah khân document an thehluhah an leina man aia hniam a lei angin an inziak tiin Barca khan buaina an lo nei hrep tawh a nih kha)

PLAYER TLANGZARHNA:
Engkim dan ang thlapa tih fel anih hnu-ah club chuan player tlangzarhna an nei thin a, a then chuan press conference te kovin an player thar te an phochhuak thin a, a then chuan an stadium-ah te mipui ko khawmin an player thar tlangzarhna te an nei thin. Hei hi tih ngei ngei tur tih a awm chuang lovin a lang a, mahse club te chuan tih ngei turah an ngai thung.