Transfer chanchinthar a ngaihnawm chho zel a, a bik takin Chelsea fans te tân thu ngaihnawm a awm leh ta. Transfer hi a tam tham deuh ṭhin avangin post hrang hranga siam thluah lovin, a inhnaih deuh hi chu ti hian post pakhatah kan dahkhawm zeuh zeuh ṭhin dawn a ni.

Chelsea right back thar Cesar Azpilicueta

Chelsea chuan tun nipui bazar-a an player thar ber ni turin Spanish right back Cesar Azpilicueta chu Marseille aṭangin an lalût fel ta. Azpilicueta hi pound maktaduai 6.5 man niin, Zirtawpni khan medical leh thil ṭul dang dang a tifel tawh a, contract thar a ziak thlap tawh a ni. A contract reizawng hi Chelsea official website ah tarlan a ni lo thung.

Kum 22 leka upa Azpilicueta hian Osasuna aṭangin a football career a ṭan a, Spain tân youth level hrang hrangah lo fehchhuak tawhin, London Olympics 2012 a Spain football team ah pawh a tel nghe nghe. Kum 2010 ah Osasuna aṭangin Marseille a zawm a, a khup hliam vangin season khatna-ah chuan a ropui bik lo. Mahse a dam hnuah Marseille right back chu a tâ ah a siam a, season hnih a awm chhungin vawi 69 a inlan hman a ni.

Stamford Bridge ah hian Spanish an mikhual lem lo a, Juan Mata, Oriol Romeu leh Fernando Torres te an awm sa tawh avangin Azpilicueta pawh hi tlangnel nghal viau turah a ngaih theih awm e. Chelsea hian Ivanovic leh Ferreira te deuh chiah right back rintlak an nei a, Ferreira hi tlakhniam lam pan mek a nih avangin Ivanovic thachhangdawltu hi an mamawh a, mahse Azpilicueta hi Ivanovic thachhangdawltu ni lovin, Ivanovic nekchhuaktu a la ni lo ang tih a sawi theih loh thung.

Ajax ah Christian Poulsen

Dutch champions AFC Ajax chuan Danish midfielder Christian Poulsen chu kum hnih chhung contract an ziahpui. Kum 32 a upa Poulsen hi free agent a ni a, Ajax aṭanga Newcastle United pantu Vurnon Anita a thlak dawn a ni.

Ajax coach Frank de Boer chuan, “Christian Poulsen hi player ṭha leh tawnhriat ngah tak a ni a, Anita thlaktu tur kan zawn fe hnuah a ni hi kan duh ber a ni. Football level sâng ber  a lo khel tawh ṭhin a, infiammi dik tak, hruaitu ṭha tak a ni. Kan squad a player naupang tak takte tân hotu a nih ngei ka beisei.” tiin a sawi. Poulsen hian Denmark tân vawi 92 a khel tawh a, Euro 2012 zawh hnu khan international football a chawlhsan thu a puang. FC Copenhagen, FC Schalke 04, Sevilla FC, Juventus, Liverpool FC leh Gaillard FC ah te a khel tawh a ni.

Inter Milan ah Gargano leh Pereira

Season hmasa-a beisei pha lo Inter Milan an inla ṭha zel a, Napoli aṭangin Uruguay midfielder Walter Gargano loan in an la. Gargano hi 2012-13 season ah a chetṭhat chuan season tâwpah kum li chhung contract a ziak thei dawn bawk.

Kum 28 a upa Gargano hi Napoli player pawimawh a ni a, season hmasa-a Italian Cup an champion pawh khan a thawhhlawk viau a ni. “Club ropui taka ka lût thei hi ka lawm a. Inter hian hun engemaw chhung chu min duh thu an tilang tawh a, min duh chhan tihlawhtling ngei turin theihtawp ka chhuah dawn a ni.” tiin a sawi.

Inter Milan hian FC Porto aṭangin Uruguay international Alvaro Pereira an lalût fel tawh bawk. Left back Pereira hi pound maktaduai 8 man a ni a, a khelh ṭhat dan azirin pound maktaduai 4 vel Inter Milan hian an pekbelh ang. Kum 26 a upa a ni a, Porto-a a khelh lai hian Europa League 2011 ah an champion a, Copa America 2011 ah Uruguay a champion pui bawk.

West Ham ah Matt Jarvis

Premier League kaithar West Ham chuan Wolves aṭangin winger Matt Jarvis an leifel tawh a, Jarvis hian kum 2017 thleng contract a ziak a ni. West Ham hian Jarvis lakluh nan pound maktaduai 10 chuang an sêng dawn a, West Ham history a player manto ber a ni ang.

Jarvis chuan, “Contract ka ziakfel thei ta hi ka lawm a, he club hi club ropui tak a ni a, Bobby Moore chauh lo pawh history ropui tak a nei bawk. Player ṭha tak tak ka khelhpui dawn a, an bula training a, khelhpui vat vat ka chak tawh hle a ni. Game rang tak leh cross ṭha tak tak ka luhpui theih ka beisei a, assist pawh nei nual turin ka inbeisei a ni.” a ti.

Sunderland ah Steven Fletcher

Premier League aṭangin an tla a, Wolves chuan an player pawimawh ber pahnih an chân der mai. West Ham-a Matt Jarvis a luh rual thuak hian Scottish striker Steven Fletcher chuan Sunderland a zawm fel ve bawk a, Black Cats tân hian kum 4 chhung contract a ziak a ni.

Sunderland hian Fletcher lakluh nan pound maktaduai 12 vel an sêng a, hemi hma pawh hian vawi tamtak lakluh tumin an lo bei hlawhchham tawh a ni. Wolves hian an striker ṭha hi chhuahtir an phal lo a, mahse Fletcher hian chhuah dilna a thehluh tak avangin an chelh zo ta lo a ni.

Kum 25 a upa Fletcher hi Inrinni zana Sunderland leh Reading intum hunah a khelh nghal tur thu tarlan a ni bawk.