January transfer-ah hi chuan nipui ang emin player lût leh chhuak an tam lem lo a. Mahse transfer season a tâwp dawn meuh chuan thuthar neuh neuh a awm leh ta nual mai.

Milan-in Lopez an la
AC Milan chuan Carlos Tevez an lalut thei lova, Catania atangin Maxi Lopez an lalut ta.

Milan hian Tevez an lakluh loh chuan Lopez hi an lalut dawn tih an lo sawi chiang tawh a. Catania tan League game 14 khel a, goal 3 khung tawh Lopez hian contract nghet erawh a ziak lova, Milan hian loan-in an lalut a ni.

Blackburn-in Dunn an hum
Premier League club che chhia Blackburn Rovers chuan an player ṭha David Dunn chu an kuah bet thei a, nakum nipui thleng daih contract an ziahpui leh ta.

Midfielder Dunn hi Rovers Youth Team chhuak niin, Birmingham City-ah kum 4 a hmang tih loh chu Blackburn tan a la inkhel char char a. Kum 32 mi a ni tawh a, Blackburn tan hian match 313 a khel tawh a, goal 53 a khung tawh a ni.

Premier League-ah an talbuai a, an defender captain Chris Samba lah chuan chhuah tumin a pute a sawisel vak vak mek a. Hetih laia an player pawimawh ber zinga mi Dunn contract an ziahpui thei hi Blackburn tan lawmna tur a ni ngei ang.

Everton-in Bilyaletdinov an hralh

Everton chuan an player lei fuh loh Diniyar Bilyaletdinov chu Spartak Moscow-ah an hralh a, an hralhna man zat puan chian a ni lo.

Bilyaletdinov hi Everton-ah hian kum hnih leh a chanve a awm hman a. Match 77 khelin, goal 9 a khung a. Kum 26 a upa niin, David Moyes-a hnuaiah hian first eleven a chang phak lo deuh reng a. Moyes chuan an beisei a phak lo tih sawiin, hralh mai ṭhaa an hriat thu a sawi a ni.

Premier League-a manager tha ber zinga mi David Moyes chuan, “Naupang fel tak a ni a. A inkhelh chuan a theihtawp chhuah thin a ni. He club-ah hian kan beisei angin a khel ṭha tawk lova, chuvang chuan player chhia a ni tihna erawh a ni hran lo. Premier League-a manager tam tak hi zawt ula, hetiang player, chhe si lo, an club-a khel ṭha hlei thei lo hi an nei nual ngei ang. Bily pawh hi hetiang hi a ni a, hralh mai kan rilruk ta a ni. Club dangah chuan a che ṭha ngei ang tih ka ring tlat a ni,” a ti.

Chelsea-ah midfielder thar

Chelsea chuan midfielder thar an nei dawn niin a lang a, nimin khan Belgian midfielder, kum 20 a upa Kevin De Bruyne chuan Stamford Bridge-ah medical a nei a ni.

Kum 20 a upa Bruyne hi Genk-a khel lai niin, Chelsea hian pound maktaduai 6.7 in an lei dawn a, kum nga leh a chanve daih contract an ziahpui ang a. Tun season chhung chu Genk hian an hawh chhuak leh rih phawt dawn a ni.

Chelsea manager Andre Villas-Boas chuan ama duh thua De Bruyne hi lei a nih loh thu leh hun rei tak club-in an enthlak tawh a nih thu leh club hma lam hun atana player pawimawh a nih rin vanga club hotuten an lakluh a nih thu a sawi kher a, a lungawi lo deuh em ni a tih theih.