Chelsea player hlui Salomon Kalou chuan French club Lille a zawmfel ṭep tawh a, Inrinni chawhnuah medical a paltlang a nih chuan ‘official’ takin Lille player a nih tur thu Dailymail chanchinbu chuan a tarlang.

Kalou hi 2011-12 season a Champions League champion Chelsea team ah a tel a. June ni 30 a a contract a zawh khan Chelsea player ni tawh lovin ‘free agent’ a ni tawh a ni. Kalou duhtu zingah hian Liverpool leh Arsenal te hming pawh a lang hman zuai zuai a, mahse tunah chuan Ligue 1 club Lille ah hian a lut ngei dawn niin a lang. Ivory Coast international Kalou hian kum li chhung Lille player ni turin contract a ziak ang a, ‘free agent’ a ni a, amah lalût tura Lille in sum an sen loh avangin signing bonus ṭha tak a dawng ngei tura rin a ni bawk.

English Premier League en ṭhinte chuan Salomon Kalou hi kan hre ngei ang. Kum 2006 ah Feyenoord aṭangin Chelsea a zawm a, Chelsea a kum 6 a awm chhungin game 155 ah goal 36 a thun hman a ni. Chelsea ‘superstar’ rual zingah a langsar ber leh pawimawh ber chu ni lo mahse player ṭangkai tak a ni a. Chelsea bench ṭhatzia tifiahtu anga sawi a ni fo.

Chelsea in Eden Hazard leh Marko Marin an lei thar a, anni pahnih lo luh hma pawha khelhna hun chang tam lo Kalou tân Chelsea kawr ha chunga khelmual luhna hun a tlem lehzual ngei ang. A ṭul thuta striker anga hman theih ni mahse Euro 2012 top scorer Fernando Torres a luahlan zawh hmel loh a, Chelsea ah Hulk a lut thut thei tih thawm a ri reng bawk nen, kum 26 a upa Kalou tân chuan Chelsea a cham chhunzawm zel chi a ni ta lo. Club lamin an lo ui lutuk lo bawk a, a contract a zawh hnuah a duh ber club zawm thei turin a chhuak ta a ni.

Kalou club thar Lille hi club tê an ni lo a, Ligue 1 champion lai ngat an ni ve tho. An player ṭha ber a ngaih theih Eden Hazard chuan Chelsea ah a chhuahsan a, Liverpool ah Joe Cole a lêt tawh bawk. Salomon Kalou hian Ligue 1 ah champion pui thei ve tak ang maw?

source: dailymail.co.uk

Inter Milan aṭangin Diego Forlan a chhuak

Uruguay striker Diego Forlan chuan Inter Milan chhuahsanin Brazilian club Internacional a zawm.

Kum 33 a upa Forlan hian nikum nipui bazar ah beiseina sang tak nen Atletico Madrid aṭangin Inter Milan a zawm a. Samuel Eto’o thlaktu tura ngaih a ni. Mahse a kum a lo upa ve tawh bawk nen, Inter Milan ah hian a khelpha meuh lo a. Game 18 chauh khelin goal 2 chiah a thun a ni.

Forlan hian Brazilian League-a khelh a chak thu a lo sawi zauh zauh tawh a, Internacional ah hian kum 3 chhung atan contract hi ziakin, thla khatah Euro nuaih 2 (€200,000) a hlawh dawn a ni.