Tu nge Pradhyum Reddy?

Posted on August 5, 2011August 5, 2011 by Mike H Tlau

2 min read

Pradhyum Reddy hi Indian ni mahse Scotland a piang a ni a. A pa hi daktawr niin UK lamah hna a thawh avangin a hun tam zawk India pawnah a hmang. Pradhyum hian UK atangin football coaching ah licence a nei a. Football a khelh lai chuan winger in a awm thin a, veilam leh dinglam ah te a khel thei. Tunah hian Mumbai lamah a nupui fanau te an cheng a. A ni hi Shillong Lajong enkawl mekin Shillong lamah a awm thung.

Nimin khan Aizawl a lo thleng a. A vawikhat hmuhna anih avangin a hmun a nawm thu a sawi bakah airport atanga a lo chhoh a, khaw thlir nuam a tih thu a sawi. Thla a lak chin te a nupui hmuhtir a chak tawh thu pawh a sawi tel. Shillong Lajong a Mizo awmte chungchang a sawinaah nimin piah a Mizo junior players te zinga Mizoram kal tur thlanna inkhel an neih thu a sawi a. He inkhel ah hian Mizo junior players deuh te an tan thu leh Mizoram lokal an chak thu te a sawi. Senior team ah hian Racy Khiangte a rawn hruai tel dawn tih a sawi bawk. Shillong Lajong hi I-League khelpha an nih avangin season lo awm turah inpuahchah that an tum ruh hle a. Season lo la awm turah pawh I-League hi an la khelpha anih zel chuan Mizoram lama pre-season inkhel neih thin tha a tih thu a sawi.

Shillong Lajong players te hi naktuk ah Aizawl an rawn thleng dawn a. Thawhtanni hian I-Day Football Invitational Tournament semi-final an khel ang. Shillong Lajong ah hian Mizo thahnem tak an awm a. A team captain pawh hi Mizo ngei, Samson Ramengmawia a ni. Shillong Lajong midfielder Ramluaha hi an coach hian a fak hle a. Ram tana khelpha thei khawpa thiam a ni tih a sawi bawk.