“Hetiang hun lo thlen hun tur hi i suangtuah ve thin ang,” tiin zanin Champions League final – a referee tur Daniele Orsato chuan a sawi.
“Ka nun a ka lo suangtuah ve thin – international final inkhel, chu pawh Champions League final ngei mai ka ham tur hi ka tan chuan mumang thleng dik a ni,” tiin kum 44 a upa chuan a sawi.
Kum 44 a upa Orsato hi Italy a khaw te tak te, Montecchio Maggiore – a piang a ni a, tuna a chenna Recoaro Terme – ah hian mi 6,000 vel an cheng. Kum 18 a nih atangin referee a ni tan a, ” Football kha ka khel ve thin a, mahse ka thiam lutuk lo. Ka thian pakhat khan refereeing lama kal turin thu min rawn a, ka kal ta a ni,” a ti bawk.
Orsato hi referee a nih bakah electrician training chhuak ngat a ni a, kum 2010 atangin FIFA referee a ni tan. Kum 2012 atang khan Champions League group stage – a ham ve zauh zauh a, kum 2016 leh 2017 khan round of 16 inkhel thenkhat a ham.
Nikum February thlaa PSG leh Manchester United te’n UCL round of 16 first leg – an khelh tum khan yellow card 10 zet phawrhin hun tawp dawnah Paul Pogba a hnawtchhuak bawk.
Tun season Champions League – ah hian match 8 a ham tawh a, heng zingah hian round of 16 first leg-a Real Madrid leh Manchester City inkhel kha a tel.
Orsato hi referee tha a ngaih a ni a, amah faktu tam tak zingah English referee hlui Graham Poll pawh a tel.
