“Modern Football” evolve zelah hian player position hrang hranga an “role” pawh a inher danglam hrat hrat zel a. Hmanlai chuan Striker ten goal an thun a, midfielder ten game an siam a, defender ten lehlam attacker te an veng thin kha a ni tlangpui a. Tuna kan Legends te zingah hian hetiang ni ve chiah lo “mi bik” kha chu tlemte te chu an awm ve chauh a nih kha. Mahse tunah zawng midfielder te (wingers, advanced-playmakers, box-to-box midfielders te a bikin) pawn goal an thun ta mawlh mawlh mai. Strikers te lah an tlan let nasain midfield leh attack line link-tu an nih chang lah a tam, fullbacks te lah an defending chauh ni lovin an attacking ability vanga faksel an ni ta.

Hei hi tunlai football tihmuhnawmtu leh tingaihnawm tu a ni a, football hmasawnna kan ti lo thei lo a ni. Position tin mai hi hmanlai te nen khaikhin chuan an “role” a danglam toh a tih theih awm e. Hei hian tunlai inhnialna tam ber tunge thiam ber tih zawhna hi chhan a ti har lehzual a ni. Tin, tunge anmahni position/role ah ah thiam ber tih lek phei chuan lu a ti hai hle. Mahse hetiang karah hian hmanlai atanga an “role” la danglam ve em em lo, hmanlai ami te leh tunlai ami te khelhdan han en kawp pawha danglamna tam tak sawi tur la awm lemlo chu Center-Back hi a ni awm e.

Center-Back chu defender a laia ding, team defense khaidingtu ber a ni. A hna ber chu lehlam attack (leiah leh boruakah) lo dan a, tlarhnung ho khawm a lehlam attacker te lo ven a ni. Center-Back tha ni tur chuan basic defending (marking, tackling leh positioning) that bakah tharum ngah, huaisen, concentration leh game-reading neih that a ngai a ni. Ball pass simple leh felfai taka defense atanga ball lachhuak thei nih a tangkai bawk. Tin, defence line organise thiam a, off-side trap siam thiam te pawh a pawimawh a ni.

Tichuan tunlai khawvela Center-back tha ber tia sawi theih chu tunge ni ta ang? Han thlir dawn ila.

JOHN TERRY 30 – Chelsea / England

Chelsea leh England defence innghahna hi khawvela “Commanding Center-Back” tha ber pawl tia sawi ngam zinga mi a ni ngei ang. He Chelsea academy graduate hi sawi tawh angin a defence a huikhawm hnehsawh em em a, boruakah a rinawm/hlauhawm bawk. Heng bakah hian a tharum a ngah a, lehlam attacker ten an “bully” hneh ngai meuh lo. A khelhdan style hi “No-nonsense defending” tih ang chi hi niin goal venna tur anih chuan a inpumpek hneh hle a, goal hlauhawm dan nan a fimkhur thiamin thil a ti mai mai lo a ni.

Mahse hetih rual hian Stiker tlanchak leh “Off the ball movement” nei tha te lakah hian a chesual leh zauh thin. A khelhdan hi tlanchak tangkai ni lem lo mah se a acceleration hi tha deuh se tih theih a ni.

NEMANJA VIDIC 30 – Manchester United / Serbia

Coach Radomir Antic in “Lungpui mai pawh a nilo, amah hi tlang a ni ber e” tia a sawi Vidic hi khawvela defender tha te zinga sawi hmaih thiang lo a ni. 2006 World Cup qualifier a Serbia “Famous Four” an tih zinga pawimawh ber kha a ni a, Manchester United in tunhnai kum 5 chhunga an trophy lak zawng zawngte an lak theihna chhan zinga mi pakhat a ni. Tharum a ngah a, boruakah a hlauhawm em em bawk hi goal ven leh tumpui te goal laka a hlauhawmna a ni. A huaisen a, a inpumpek hneh em em bawk a, player rothap tak a niin defender dangte kaihhruaitu a ni bawk.

Striker tlanchak lakah chetsual erawh a nei ve thin a, tin, ball a kang a an vawrh khumin a talbuai leh zauh thin.

VINCENT KOMPANY 25 – Manchester City / Belgium

Manchester City player manto rual zingah hian he Belgian defender £ 6 million man hi a pawimawh ber ti hial ila kan sawisual tam lo ang. City in champion tuma an beihna kawnga an defender rinrawl hi player naupang beiseiawm atangin a theihna a hlenchhuak chak hle a. Tunah chuan khawvela defender tha ber te zinga hmaih theih ni ta lo hial a ni. A nghetin a rintlak em em a. Tin, a chi-ai mai mai lo hi a teammate ten an chhawr tangkai  a, a marking leh tackling te hi top-class tih ngam a ni a, a versatility a that avang hian midfield ah leh fullback ah pawh a tulna anga chhawr theih a ni hi a tangkaina tizualtu a ni.

Lei lama a rintlak ang erawh chuan a aerial ability hi duhthu a la sam lo deuh a, long-ball leh set-piece ah heihi a langsar thin a ni.

THIAGO SILVA 27 – AC Milan / Brazil

Tunlaia player tha apiang umzuitu Real Madrid ten an hel leh mek Thiago Silva hi AC Milan player pawimawh ber ti ila a awm lo hran lo. Chuti khawp chuan he defender hian hma a sawn a ni. Defender tha ni tura attributes zawng zawng a nei vek tih theih a ni. A tlanchak a, a game-reading a tha a, basic defending (marking,tackling leh positioning) a tha bawk a, boruakah pawh a rintlak em em a ni. Tin, a ball thiam em em hi midang te laka a danglamna a ni a, defence atanga ball lachhuak turin pass kher lovin chak taka a tlanpui thut thin hian a teammate te tana tangkai hle thin a ni. A chesual ve mai mai lo te, a huaisenna leh a consistent lutuk hi a fakawm em em bawk a ni.

A tlanchhuak thin hi defence a a kawppui ten an cover that loh chuan teamin an tuar thin a. Season pawimawh hunlai/run-in laia a inhliam thei lutuk hi a vanduai vang chu ni mah se hei hian a natural fitness lamah zawhna a siam ve a ni.

GIORGIO CHIELLINI 27 – Juventus / Italy

He Juventus defender rothap hi Italy National team defence innghahna niin Fabio Cannavaro, Franco Baresi, Alessandro Nesta te hnung zuiin khawvelah Italian Centerback te hi a “ber” te zinga mi an ni tih phochhuak chhunzawmtu a ni. A huaisen a, khawvela tackler tha ber tihtheih a ni. Tharum a ngah em em bawk a, tin, a aerial ability hi a thatna a ni bawk. Left-back ah buai miahlovin a chhawr theihna hi a team tana a pawimawh lehzualna a ni.

Chetsual zeuh a ching leh thin hi sawiselna tur chu a ni a. Tin, attacker movement tha deuh chuan a positioning duhthu la sam loh avang hian an isolate leh thin a ni.

LUCIO 33 – Inter Milan / Brazil

He Inter Milan leh Brazil inghahna pawimawh hi a club leh ram te tunhnaiah beisei pha lo mah se a quality leh form ah hian a lang lo a ni. A game reading tha lutuk leh huaisen bawk, timing leh positioning dik bawk si hian he kum 33 mi hi a upa tulh tulh a, a tha tulh tulh emaw tih tur khawp a ni. Barca attack dang thei sawi tur awm pheuh pheuh te zinga a lawk ber a nihna hian a thatzia chu a tilang.

Ani pawh hi defender thenkhatte ang bawkin attacker tlanchak leh movement tha te lakah chetsual a ching a. A concentration level hi achang hian duhthu a sam lova, chetsual a neih phah ta thin a ni.

PEPE 28 – Real Madrid / Portugal

Khawvela player huaisen leh “physical” ber te zinga mi he portuguese star hi a team defence innghahna a ni chiang hle a ni. A basic defending a that piahlamah a tharum ngah leh huaisen a chhawr tangkai em em a, a game a rough-in lehlam player te space leh hun a pe ngai lo a ni. Tin, a versatility hi a pawimawhna pakhat a ni bawk a. Barcelona nen an inkhelh tum khan defensive midfielder anga khelin Barca midfield ball thiam rual chhu chat tu kha a ni. “Born Defender” kan tih ang chi hi a ni.

A aggression avang hian a talbuai fo a, a thinchhe lutuk avang hian a decision-making in a tuar a, card a hmuh phah ngunin free-kick a chawi ngun phah a ni. Suspension a tawn hnem phah bawk a hei hian a team a nghawng thin ta a ni.

GERARD PIQUE 24 – FC Barcelona / Spain

Manchester unitd chhuahsan a Barcelona a star player rawn ni ta nghal Spain International Gerard Pique hi Commanding Center-back, tharum ngah leh game-reading tha lutuk a ni a. Tin, ball a thiam telin awlsam takin defence atangin ball a la chhuak thei a ni. Defender rothap te angin ti ve pup pup lem lo mah se a positioning leh game-reading that em avang hian goal hlauhawm tur a lo hmu lawk thiam a, awlsam takin a dan theih phah thin a ni. Defender complete ber te zinga mi niin khawvela attacker hlauhawm ber ber te lakah pawh a nghet hle a ni. Holding Midfielder ah pawh a rintlak hle bawk a ni.

Defender rang ber erawh a ni lem lo a, attacker pace ngah leh direct taka ball luhpui thin lakah a talbuai ve zeuh zeuh a ni.

Hengte hi tunlaia defender te zinga a chetha leh langsar lawr te chu an ni e. Heng mite thlanchhuah an nih bikna chhan chu tunhnaia an performance bakah team tana an pawimawh dan te, tin, inelna hrang hranga an performance atangte leh an game khelh tam dan a zir te pawh a ni bawk e. Zofooty readers te enge kan ngaihdan ni ve le ?

Helaia tarlan loh langsar zual te 

Thomas Vermaelen (Arsenal/Belgium), Carlos Puyol (FC Barcelona/Spain), David Luiz (Chelsea/Brazil), Ricardo Carvalho (Real Madrid/Portugal), Jamie Carragher (Liverpool/England), Rio Ferdinand (Manchester United/England), Alessandro Nesta (AC Milan/Italy), Philippe Mexes (AC Milan/France)

Post leh hunah chuan “Tu te nge next top class center-back ni thei tur te”…