Footballer te hi infiammi zingah rau rau pawh a fit pawl tak an ni awm e. Heti chung hian vanduai palh châng a awm lo thei lo a, inkhel thei lo khawpin an inhliam ve tho mai. Tunhnaia player inhliam langsar zual deuhte hi in en thuak thuak teh ang.

(Post pakhata sawi vek sen a ni hauh lo a, kim pawh a kim kher lo ang. Comments lamah thawhbelh theih reng a ni e).

Inzai turin Brazil-ah Maicon a hâw dawn

Inter Milan Brazilian right back, a vanglaia khawvela right back ‘hlauhawm’ ber pawl Maicon chuan training na-ah a khup ruh chuktuah (meniscus) a ti nâ a, hei hi doctor ten an enfiah hnuin zai a ngai dawn. Inzai tur hian Brazil lamah a hâw dawn a, a chawlh hun chhung tur hi club lam chuan an la sawichiang thei lo a ni.

Inhliam nan hun ṭha a awm lo a, mahse Maicon inhliam hun hi a fuh lo lehzual ngei mai. Tunhnaiah tlemin a game a tlahniam deuh a, a kum a tam ve ṭan tawh nen, season ṭan ṭep tawhah zai ngaia a awm hi a vanduai takmeuh a ni. Inter Milan hian Brazilian right back tho Jonathan an lei thar bawk nen, Maicon tan hun tâwp a hnai tawh em ni?

Ibrahimovic kar hnih a cháwl dawn

AC Milan player pawimawh, Swedish star Zlatan Ibrahimovic pawhin a kheimit a ti nâ a, kar 2 vel a chawlh a ngai dawn niin AC Milan club in an puang. ‘Ibradacabra’ hian training na-a inhliam a ni a, season bul a ṭan ve hman dawn lo niin a lang.

Serie A champion hian August 27 ah Cagliari tumin season thar an ṭan dawn a ni.

Spurs midfield a ruak

Tottenham Hotspurs in naktuk zânah Europa League play-off an khel dawn a, an midfielder ṭha te an inhliam zo deuh vek.

Luka Modric, Tom Huddlestone, Jermain Jenas, Sandro leh Palacios te chu naktuk zanah hian an khel thei lo vek dawn a, Rafael van der Vaart dam hman lo phei se an buai hle ang.

Manager Harry Redknapp chuan club official website ah an inhliam dan a hrilh a, “Tom (Huddlestone) hian season hmasa tâwp lam khan a kheimit a ti nâ a, naktuk zanah a khel thei lo ang” a ti. Midang chungchang pawh sawiin, “Jermain Jenas hi a ngal ruh nâ a dam hman lo a, Modric leh Palacios pawh an khel thei lo ang. Sandro phei chu hun rei tak (long term) a chawlh a la ngai dawn a ni” a ti. Kan hriat ṭheuh angin an vai hian central midfielder vek an ni.

 Arsenal defender te  pawh an bâng lo

Arsenal defender pahnih, Kieran Gibbs leh Johan Djourou te chu kartawpa Liverpool nen an inkhelh hunah an tel ve thei lo maithei. Anni pahnih hi Udinese nen an intum khan an khel tluan thei lo ve ve a, malpui tha nâ (hamstring) vang ve ve a ni.

Arsenal website chuan Gibbs leh Djourou te inhliam hi a ‘tenau’ niin a sawi a, hei vang hian kartawpah pawh inkhel thei lo tawp tur ang chuan an ziak lem lo. Zirtawpni velah a chian theih a beiseiawm.

Roma veteran te an dam lo

Rome khaw club lian AS Roma player rinawm pahnih Francesco Totti leh Simone Perotta te pawhin Europa League playogg an khel thei dawn lo. Club thuchhuahin a sawi danin Totti hi ‘muscle problem’ vangin a khel thei dawn lo. Perotta hi chu squad ah pawh telh a ni a, mahse a fit hman dawn loh avangin a inkhel ve lo ang.

AS Roma hian naktuk zanah Slovan Bratislava nen playoff hi an khel dawn a, first leg hi Slovakia ah khelh a ni ang.

Rin aiin Vidic a dam hma dawn

Manchester United kulhpui Nemanja Vidic chu beisei aiin a inkhel leh hma thei dawn. Vidic hi kar hnih vel chawl tura ngaih a ni a, mahse kar khat bak a ngai leh dawn lo niin a lang.

Rio Ferdinand leh Rafael da Silva te erawh kar 6 leh kar 10 chhung ve ve an chawlh a ngai dawn thung.