U-18 I-LEAGUE AH MIZO HMEL A THA

Minerva Punjab 1-4 AIFF Elite Academy
Min: Krishna Pandit 65′
Aiff: Lalengzama Vangchhia 19′, Edmund Lalrindika 33′, 38′, Moirangthem Thoiba Singh 76′
.
India ram huap football inelna hrang hranga Mizo hming a lansarh mek laiin U-18 I-League National Finals khelh mekah pawh Mizo hmel a that chhunzawm zel.

Nimina inkhelah champion lai AIFF Elite Academy chuan Minerva Punjab chu 4-1 in an sawp a, AIFF lamah hian Mizo rawlthar 6 – Edmund Lalrindika (Bazarveng, Lunglei, Lalliansanga Renthlei (Venghlun, Lunglei), Lalengzama Vangchhia (Electric Veng, Lunglei), B Lalnuntluanga (Serkawn, Lunglei), Zonunmawia (Champhai) leh Joseph Lalsanglura (Durtlang, Aizawl) ten bul an tan.

Lalengzama Vangchhia chuan minute 19-naah goal hmahruai thunin, Edmund Lalrindika’n minute 33 leh 38-naah rawn thun velehin chawlhlawk hmain si 3 faiin hma an hruai hman. Second half-ah Minerva tan Krishna Pandit chuan an si phurh rawn sut then mahse Moirangthem Thoiba Singh chuan B.Lalnuntluanga cross chu an lama a tih goal leh avangin Punjab club tan thawhchhuah ngaihna a awm tawh lo.

East Bengal in 3-1 a Pune FC an hnehnaah pawh Mizo hming a langsar leh ber a, Kolkata club tan hian Lunglei Electric Veng rawlthar Lalchhanhima (Tetepuia) chuan goal 2 thunin bench-ah Henry Lalthazuala (Electric Veng, Lunglei) leh C.Rohlupuia (Farm Veng, Lunglei) te an awm bawk. Lut ta chiah lo mahse Pune FC bench-ah hian Omega Vanlalhruaitluanga a awm bawk.

Tin, TFA hneh zo ta lo Shillong Lajong Football Club-ah hian Mizo rawlthar Joe Zoherliana leh F. Lalrohlua ten bul an tan a, bench-ah Jeremy Laldinpuia leh Jakob Vanlalhimpuia te an la awm cheu bawk.

DSK leh Bengaluru te goal inpe lova an inhneh tawk tumin BFC lamah Lalrintluanga Chawnglut a awm a, Mizo team tia chhal ngam thuak DSK XI-ah Lalnunsiama, Lalthathanga Khawlhring, Lalawmpuia leh F.malsawmtluanga te awmin bench-ah Lalramchhuana a awm bawk a ni.

U-18 I-League National Finals hi April 28, 2017 atang khan Kolkata-ah khelh tan niin team 12 an tel a, heng team telte hi group 3-ah then niin group tina a sang ber leh table a 2-na zinga a sang berin semi-final an lut ang.

Defending Champion AIFF Academy hi Minerva Punjab FC, Shillong Lajong FC leh JSW Bengaluru FC te nen Group C-ah an awm ho.

Group thenhran te hian hmun hran theuhah an khel dawn a – Kalyani Stadium (Group A), East Bengal Ground (Group B) leh Barasat Stadium (Group C) ah te khelin semi-final chu Barasat Stadium-ah May 5, 2017) hian khelh a ni dawn a, final chu May 7, 2017 hian khelh a ni ang.

Hetiang hi group thenhran dan chu a ni :

Group A: Bhaichung Bhutia Football Schools, United SC, Salgaocar FC, Royal Wahingdoh FC

Group B: Tata Football Academy, Shillong Lajong FC, FC Pune City, East Bengal

Group C: Minerva Punjab FC, AIFF Academy, DSK Shivajians FC, JSW Bengaluru FC

Inkhel result dangte :

DSK Shivajians 0-0 Bengaluru FC
Bhaichung Bhutia Football Schools 0-9 United Sports Club
Salgaocar FC 3-2 Royal Wahingdoh FC
Pune FC 1-3 East Bengal Footbal
Tata Football Academy 1-0 Shillong Lajong