St Jakob-Park-ah subtitute atanga rawn lut Valentin Stoker in hun tawp dawn a goal a thun hmangin mualneitu Basel in Bayern Munich an hneh a. Hetihlai hian Inter Milan in khualmual-ah Didier Deschamps a hote an hnehlo, Marseille tan hian Andre Ayew chuan hun tawp dawnah a head goal.

Basel 1-0 Bayern Munich
Basel hian Manchester United hneh tawh mahse mi tam takin vanneih vanga an ngai a, Bayern Munich laka an result hi an beise lo. Mahse an mualah an thil theih an lantir a, chutihrualin vanneihna erawh an nei bawk.
Basel Keeper Yann Sommer a khel tha em em a, vawi duai lo Bayern thun tur a save a. Mario Gomez, Frank Ribery leh David Alaba te tan a luhai thlak hle. Chutihrualin an in draw dawn mai emaw tih laiin minute 86 naah Jacques Zoua ball tha tak chu Stocker in a lo thun avangin Bayern hi an chaklo ta a ni.

Engnge an sawi?
Bayern Munich hian an home ah Champions League final ni 19 May 2012 hian an thleng dawn a, mahse hemi thleng tur chuan ni 13 March 2012-ah an home Allianz Arena-ah Basel hi an hneh ngei a ngai ang. Bayern coach Jupp Heynckes chuan,”A tirah khan chance tha tak pahnih kan nei nghal a, inkhelh hahdam tak khel tur chuan kha chance kha thun a ngai a ni” tiin a tir lama an thelh chu an chaklohna chhanah a ngai a. Minute 240 chhung goal thun tawhlo Bayern coach chuan insiamthat a ngaih tur thu sawi nghalin,”Tuna kan awmdan hi 2nd leg khelh leh hun atan a tawk lova, kan chak chhoh leh a ngai a ni,” a ti.

Hetihlai hian Basel Coach Vogel chuan an chak chhanah a naute chu fakin,”talent leh quality leh rinna kan chakpui a ni,” a ti. A team boruak that zia pawh sawiin,”Kan chak theih chhan chu thil ho tak a ni, kan chak duhna hi a mak tih tham a ni a, team boruak pawh a tha em em bawk,” tiin a sawi.

Marseille 1-0 Inter Milan
Inter Milan khelchhiat a kaltluang zel a, tunah hian match 7 ngawt tournament hrang hrang ah an chak tawh lo a ni. Inkhel nung lo ve takah hian an indraw tawh mai emaw tih laiin minute 90 naah corner atanga ball lo kal chu Andre Ayew chuan sang taka zuangin a lo head goal ta a ni. Inter hian Mourinho chhuah hnuah ngai an awh thei tawh meuh loh avangin coach Claudio Ranieri dinhmun erawh a tha vaklo.

Chutilaiin Marseille coach Didier Deschamps a ropui zel a, amah chiah hi tun knockout phase ah hian Manager player anga champion a awm tawh a ni. 1993 khan Marseile a Champion pui a, 1996 ah Juventus a Champion pui bawk. Mahse 2001 Final ah erawh Bayern Munich lakah a team Valencia an vanduai thung a ni. Player thiam taka sawi tur ni ngailo Deschamps hi player tangkai tih chi kha a ni ve a, chumipiah lamah chuan a leadership quality hi an fak ber a ni.