May ni 19 a ni ang a, European club football match zinga en hlawh ber – Champions League final chu Munich khawpuia football club ropui tak, Bayern Munich stadium – Allianz Arena ah mual neitu Bayern Munich leh Chelsea ten an khel ang. Chutih hunah chuan (kan dam a nih chuan) hmuhnawm ti takin inkhel kan en ang a, chutih laia kan lo hriat ve turin, Allianz Arena chanchin tlem i lo chhui chiang teh ang.

Allianz Arena hi a desing hrim hrim pawh football stadium dang aiin a danglam bik a. A stadium tihen nan ringawt hian CFL light bulb 25344 zuk hmang a! Chu mai ni lo, a danglam bikna i hre dawn e, chhiar zel teh.

Alpha:

Stadium sak a nih hma hian buaina tur tam tak a awm dawn tih a chiang sa. Munich hian stadium thar a mamawh em tih ngaihtuah a ni a, he khawpui ropuia stadium lian ber – Olympiastadion awmna hmunah sak a ni ang em tihte pawh ngaihtuah a ngai.

Munich thuneitute chuan mipui ngaihdan lak thain an hria a. Stadium thar sak tul ti leh ti lo vote an thlak ta a. Hetah hian Munich khawpuia puitling vote nei thei za a 37.5 in vote an thlak a. Vote thlak zawng zawng za a 65.8 chuan stadium thar sak an duh a. Chu thutlukna hmang chuan ‘The Swiss architects Herzog & de Meuron’ te chu he stadium sa tur hian rawih an ni a, Allianz SE chu a hming tumtu an ni ta zel a ni.

Kum thum pawh tling lo:

Kum 2002 October ni 21 khan Europe-a football stadium thar ber tur chu sak tan a ni ta a. Kum thum pawh tling lovah stadium ropui tak chu an sa zo der a. An sak zawh atangin Bayern Munich leh an khaw club dang, 1860 Munich te chuan home stadium-ah an hmang nghal a ni.

A pawn lam atang ringawt pawhin a danglam a. A bang atan lunghlu pianphunga duan, bang hrang hrang 2760 hmanga bel a ni a. Heng bang atana an hman hi paper phek ang leka chhah (0.2millimetres) a ni a. A bang atana an hmanrua hi mal 1065 chu a sen (Bayern rawng) a dumpawl (1860 rawng) leh a var tein tihen theih a ni.

Stadium chhungah hian quality tha ber chi inkhelhna field a awm a. A field zau zawng hi 105m a sei, 68m a zau a ni a. Grass phah hi thlak a ngai a nih chuan, truck phur 20 vel grass a ngai a, a phah that nan ni hnih leh a chanve hman a ngai dawn a ni.

Field chhunga (pitch) boruak hi hnuai lam atangin tih luma tih vawh theih tura ruahman niin, a fur a thalin 35 leh 50 degree celcius inkarah a dah theih reng a. Grass hnuaiah hian ruah a sur a, tui a tam pawha paih nghal thei turin pipe 14 phum a ni.

A hawnna – 2005:

Allianz Arena-a inkhel hmasa ber chu 2005 May ni 30 khan khelh a ni a. Hetah hian 1860 Munich leh Nurnberg-te inkhelin, 1860 hian 3-2 in hnehna an chang a. A tukah Bayern Munich leh German national team-te chuan exhibition match an khel leh a, Bayern hi 4-2 in an chak. Heng match pahnihte hi stadium khat tlatin, mipui 66000 in an en ve ve a. Tichuan, Euro maktaduai 340 senga sak Arena chu hawn a ni ta a ni.

Entute leh a behbawm:

2006 January ni 16 khan Munich thuneitute chuan League leh Germany ram chhung inkhelhna bikah chuan entu mipui 69,901 thlenga luh an phal a. Amaherawhchu international leh European match-ah chuan entu mipui luh theih zat chu 66000 a ni zel a ni.

Arena-ah hian business seat 2000 a awm a, chanchinbu mite tan seat 400 hauhsak an ni bawk a. Pianphunga rualbanlote tan seast 165 reserve a ni. Box (pindan) 106 siam a ni a, heng pindante hi kum khat chhung atan lei theih a ni a, a leitute chuan an duh ang rawng rawnga an chei phalsak an ni.

Motor dahna pawh Europe-a stadium zinga nei zau ber niin, car 9800 lenna garage a awm a (hemi zinga 130 chu rualbanlote tan a ni), bus 350 a dah theih bawk.

Ei leh in a awm:

Allianz Arena-ah hian dawr te (kiosk) 28 lai a awm a. Restaurant pahnih a awm bawk a. Inkhelh ni chuan heng dawrte hi an lun thei hle a. German Sausage (A German chuan – bratwurst a ni a, Enge Mizo tawngin?) phei chu second khat zelah 1.23 (pakhat aia tam!) an hralh a. Pawisa pek nghal a ngai a, chu bakah Arena Card neite tan chuan card hmang pawha ei tur lam theih a ni bawk.

Heng ei tur tam tak bakah hian FC Bayern Megastore a awm a, chu bakah chuan en tur hrim hrim LEGO Kids’ Club a la awm a. LED video screen lian em em – fit 100 a lian (100sq ft) pahnih a awm a. Hmun hrang hrangah 300 Samsung HD TV a ther fur bawk a. Tunah hian Special centre an sa leh mek a, tun thla chhung hian zawh fel an inbeisei.

Inkhelh hmain engtin?:

Allianz Arena-ah hian inkhel tur hi a hun dik taka tih thlip thlep a ni a. Inkhelh hma minute 75 a awmin player-ten Press area an chhuahsan a, stadium an lut a. Minute 35 hnuah an inti lum (warm-up) tan a. Tan nan minute 10 a la awmin dressing room-ah an let leh vek a. Minute 5 a la awmin tunnel-ah player-te an awm tawh a, minute 2-ah referee-in signal pein, tunnel an chhuahsan chiah chiah thin. Final an khelh hunah pawh chutiang chiah chuan an ti a, an lo chhuak tih kan hre dawn nia .. 😀

Champions League final en nuam vek u le.