Champions League Quarterfinals second leg thlirlêt ang u.

Barca an tlang – Messi a ropui zual zel

Champion lai Barcelona chuan AC Milan hnehin tun season Champions League semi-final an thleng leh ta a. quarter-final khelh hnihnaah, khelh khatnaa goal awm lova an draw AC Milan hi Camp Nou-ah Barca hian 3-1 in an lo hneh a ni.

He inkhelah hian a ngai bawkin, a pa lian ber ni hauh lo Lionel Messi chu a langsar leh ber a. Messi hian a khelh chhiat loh mai bakah he inkhelah hian penalty vawihnih a pet goal a, kum 24 chauh niin, Champions League-a goal khung hnem pathumna a ni phak ta.

Minute 11-naah Messi hian ama penalty hlawh chhuah chu petin, goal a khung nghal a. Mahse Milan tan Antonio Nocerino chuan an si phurh a rawn sut ve leh tlat a, 1-1 niin, away goal hmangin Milan an lut thei a, Barca an tang na khawp mai.Amaherawhchu first half tawp hmain Alessandro Nesta chuan tul lo takin Sergio Busquets chu box chhungah a pawt a, penalty a chawi a, Messi bawkin a khung leh a, 2-1 in hma an hruai a ni.

Second half-ah Messi siamsak chu Andres Iniesta chuan goal-ah a chantir a, Milan beiseina a titawp a, an chakpui ta a. Barca hi Iniesta goal khungna match-ah an la chak lo ngai lo a ni.

Champions League a nih hnu hian eng club mahin an champion lallukhum an la hum ngai lova, Barca hian May ni 19-a final-ah chakin an hum thei dawn em tih chu zawhna a ni mek a. Kan hriat angin season liamta khan final-ah Manchester United hnehin Barca hi an champion a nih kha.

Messi hian tun season-ah Barca tan goal 58 a khuing tling ta a. Champions League match-ah goal 51 khung tawhin, a aia khung tam chu Ruud van Nistelrooy (56 goals) leh Raul (71 goals) te chauh an ni tawh a. Kum 24 chauh niin, Champions League-a goal 50 khung tling thei zinga naupang ber record a siam thar bawk a. Chu mai chu ni lovin, tun season-ah Champions League bikah hian goal 14 khungin, season khata goal khung hnem ber record a siam ta bawk a. Eng ang pawhin Messi hi sawisel ni mahse, a khelhna apianga record a siam chho zel mai si a, sawisel hleih theih a ni lo, a thiam ber a nih loh pawhin, a thiam ber zinga mi chu a ni tih hi a chiang e!

Bayern kawng a awlsam

German club ropui Bayern Munich chuan khelh khatnaa 2-0 a an va hneh tawh French club Marseille chu Allianz Arena-ah an lo mikhual a, 2-0 bawka lo hnehin, goal khung belhkhawm (aggregate) ah 4-0 a chakin Champions League semi-final chu awlsam takin an lut a. May ni 19-a an home ground-a final khelh hunah finalist nih ngei an tum hle.

Quarter-final khelh hnihnaah hian 2-0 a hma hruai sa Bayern hian an ti mai mai lo nghal a. Franck Ribery siamsak chu Ivica Olic chuan goal-ah chantir nghalin, an hmahruaina an belhchhah nghal thuai a. Hemi hnuah pawh hian Bayern hian an la duhtawk lo cheu a, David Alaba cross chu Olic bawk hian a khung leh a, 2-0 in an chak ta a ni.

Inkhelh pumpuiah Bayern hi Marseille hian an khan lova, an tibuai mang lo a ni ber mai a. A tira beisei sa ang ngeiin Bayern chuan semi-final chu awlsam takin an lut a, season thum chhunga semi-final vawihnih an luhna a ni. Semi-final-ah hian Real Madrid nen an intum ngei dawn  a, final ai mahin a hmuhnawm maithei.

Bayern hi tun season-ah an che tha hle a. Bundesliga-ah champion thei dinhmunah an la ding a, German Cup-ah champion thei an la ni bawk a, Champions League-ah an dinhmun kan hre bawk a, treble champion ni thei an la nih chu. Champions League-ah hian vawi 4 an champion tawh a ni.

Chelsea an chak sia! 

First leg-ah 1-0 in away-ah an chak a, semi-final lut tura beiseiawm zawk an ni sa a, mahse a chiang chuang lo. Stamford Bridge-a second leg inkhelah 2-1 in hnehna an chang leh a, belhkhawmin 3-1 a chakin semi-final an thleng ta nge nge.

Frank Lampard chuan Chelsea tan vawi 550 a khelhna niin, penalty a pet goal a. Garcia chuan Benfica tan goal khat a khung a, hun pek belhah Raul Meireles chuan goal mawi tak khungin semi-final-a Barcelona tum turin Chelsea an chak chiang ta a ni.

He inkhelah hian referee Damir Skomina chu a langsar ber a tih theih awm e. Yellow card vawi 8 a phawrh a, Benfica player Maxi Pereira a hnawtchhuak bawk.

Inkhelh banah Chelsea boss lailawk Roberto Di Matteo chuan, “Second leg-ah khan inkhelh harsa tak kan hmachhawn dawn tih kan hre sa a. Benfica hi club tha tak an ni a, 1-0 in hma hruai mah ila chance an nei tih an inhre ve reng a ni,” a ti.

Barcelona an tum leh tur chungchang zawhna chu a chhang pial a, “Kan chak hi ka’n lawm phawt ang a, Inrinniah Wigan kan khel leh dawn a, chu chu kan ngaihtuah hmasa phawt ang chu,” a ti daih a. “Barcelona hi khawvela team tha ber an nih loh pawhin teamtha ber zinga mi an ni chiang a, anni nena semi-final kan khel tur hi a phurawm a ni,” a ti bawk.

Benfica boss Jorge Jesus chuan, “Kan chak lo hi ka hrethiam lo. Chelsea aia club tha kan hnawtchhuak nual tawh a ni,” a ti a. “Chelsea hian Barcelona lakah chuan chance an neiin ka hre lo, ka hre dik lo maithei bawk a,” a ti.

5 Star Real an tlang

Khelh khatnaah khan 3-0 in an chak a, chuvangin Cyprus club APOEL Nicosia hian Real Madrid lamah goal 4 an khung theih a rinawm loh sa a. Beisei ang ngeiin khelh hnihnaah pawh Real hi a chungnung zawk niin, 5-2 in hnehna an chang a, Bayern Munich nen inkhel turin semi-final an inhlangkai a ni.

He inkhelah hian Cristiano Ronaldo chuan minute 25-naah Real goal 5 zinga a hmasa ber a khung a. First half tawp hmain Kaka chuan goal hnihna a khung a, half-time a ni.

Second half laihawl velah Gustavo Manduca hmangin APOEL chuan team goal mawi tak mai an rawn khung a. Mahse Ronaldo chuan hemi hnu lawk hian goal khung lehin, Real dinhmun a chhe hman lova. Substitute pahnih Jose Maria Callejon leh Angel Di Maria ten goal an khung leh hnuah APEOL tan minute 82-naah Esteban Solari chuan goal khat a khung leh a ni.

Inkhelh banah Real boss Jose Mourinho chuan, “APOEL hian goal 4 an khung tlin kan ring lo sa a, chuvangin ka naute an phur hleithei lo zawk a ni. Mahse kan hna chu tha takin kan thawk a, player thenkhat kan chawlhtir thei bawk a ni,” a ti.

A club hlui Chelsea-in semi-final an thleng ve bawk a, Barcelona an hneh a, Real-in Bayern Munich an hneh bawk chuan a club hlui nen an final theih avangin chanchinbumite chuan a ngaihdan an zawt a. Mourinho chuan, “Real Madrid leh Chelsea hi kan final ka ring lo. Bayern leh Barcelona a nih ka ring zawk, Real leh Chelsea chu ka ring lo a ni,” a ti tawp mai!