Champions League round 1 chu khelh zawh a ni ta. Nilaini zânah inkhel hmuhnawm tak tak kan hmu a, Manchester club pahnihin an khingpuite an draw ve ve a, San Siro-ah Inter Milan an chak lo a, khualmualah Real Madrid 1-0 in an chak thung.

MANCHESTER CITY 1 -1 NAPOLI (CAVANI 69′, KOLOROV 74′)

Etihad stadium-ah Manchester City leh Napoli ten Champions League-a an game hmasa ber ve ve an khel a, 1-1 in an inhnehtawk.

Manchester City: Hart, Zabaleta, Kompany, Lescott, Kolarov, Yaya Toure, Barry, Silva, Nasri, Aguero, Dzeko

Napoli: De Sanctis, Aronica, Campagnaro, Cannavaro, Maggio, Gargano, Inler, Zuniga, Hamsik, Cavani, Lavezzi.

Tawn ngai loh thil tawng an ni bawk a, fans te an phur a, field chhunga player te pawh an phur kher mai. Man City in bul an ṭan tha hle a, Napoli defender te an suhawng zeuh zeuh a, striker pahnih Aguero leh Dzeko kan hmu hnem. Serie A lama an sawi vul chûk Napoli forward te hi an lo ṭha tak tak tih kan hmu a, a bikin Cavani leh Lavezzi te counter attack-ah an hlauhawm ṭhin ngei mai.

First half-ah Lavezzi leh Yaya Toure ten goal bar an pet per ve ve a, City in ball chang tamin goal chance pawh an ngah zawk. Napoli tlarhnungah Campagnaro leh Cannavaro te an lang ngun hle a, goal chhuah miah lova Napoli in half time an thleng thei kha, an defence ṭhat vang chu ni bawk mahse City forward te ‘luck loh’ vang a ni mah zawk.

Cavani!! Kolarov!!

An inkhel rei tial tial a, an inhnehtawk tial tial. Minute 66 ah Hamsik chuan chance ṭha tak neiin a thun lo a. Hemi hnu lawk, minute 69 ah Gareth Barry pass sual aṭanga Napoli counter attack aṭangin Edinson Cavani chuan a thun a, hei hi Champions League-a Napoli goal hmasa ber a ni. Napoli fans an sapatal a ni ber mai.

ManCity lamin an nawrlet ve nghal a, Aguero chuan goal bar a pet per a, minute 74′ ah left back Aleksandar Kolarov chuan freekick aṭangin an siphurh a sût. A tawp thlengin team pahnihte pet goal tumin an innawr a, attacking game hmuhnawm tak kan hmu. Edin Dzeko a khel ṭha leh hle a, 1-1 a nih laia a pet goal loh kha City lamin an ui vawng vawng ang.

Beisei aiin goal a lut tam lo a. Mahse football team pahnih, goal thun tuma innawrtawn hi chu a hmuhnawm loh ngai lo a, he match pawh hi (a bik takin second half) tun season-a inkhel hmuhnawm pawl tak a ni ngei ang.

BENFICA 1 -1 MANCHESTER UNITED (Cardozo 24′, Giggs 42′)

England-a goal thun reng mai Manchester United in home-a chak lo ngai mang lo Benfica an tlawh a, chak zawk awmlo in an inṭhen. A hmasain tutenge khel en phawt ang.

Benfica: Artur; Maxi Pereira, Luisao, Garay, Emerson; Ruben Amorim (Nolito 56′), Javi Garcia, Witsel; Aimar(Matic 75′), Cardozo, Gaitan (Cesar 92′).

Manchester United: Lindegaard; Fabio (Jones 79′), Smalling, Evans, Evra; Fletcher (Hernandez 68′), Carrick; Valencia (Nani 68′), Giggs, Park; Rooney.

Benfica tân tlarhmaah Cardozo awmin ani hi Gaitan leh Aimar ten an pui a, 4-3-3 formation hmangin midfield-ah an inrem phui hle. Sir Alex-a’n  Premier League-a a player hman ho a dahṭha a, puitling ho a luhtir. Tlarhma-ah Rooney maltlatin Park leh Valencia te a sirah an awm a, Giggs chu ‘Rooney role’ pek a ni. Tun season-a a vawkhatna atan Carrick leh Fletcher a lâiah an ding dun bawk.

First half-ah goal nalh pahnih

Inkhel an ṭan a, United winger Valencia a langsar nghal a, mahse a langsar rei lo ngang mai. Inkhel tir lamah Benfica an chungnung zawk a, United midfielder ten ball an pass sual leh khut ṭhin. Benfica veilamah ball thiam Gaitan che vel a hmuhnawm a, minute 17 na-ah a goal shoot uluk deuh se chu pet goal thei dinhmunah a ding. Khel ṭha zawk Benfica hian goal thun hmasain minute 24 na-ah Cardozo chuan a pet goal. He goal thun thei tura Gaitan pass, Cardozo first touch leh a finish te chu ‘tawih’ hlawm tak a ni.

Hemi hnu hian United in ball an chang tam tial tial a, Benfica defence tan buaina an siam tam lem lo thung. Rooney leh Luisao invêng a hmuhnawm khawp mai. Minute 42 na-ah first half chhung zawnga lang mang lo Ryan Giggs a rawn lang thut a, ball a tlanpui hnuah a ke veilam ngeiin goal ‘mawi’ tak a rawn thun. Giggs hi British player zinga Champions League goal thun hnem ber a ni.

Second half :Goal awm lo inkhel hmuhnawm

Second half ah mikhual lam hian bulṭan tha zawkin Valencia leh Giggs te hmangin an thun teuh hle. Minute 56 ah Nolito a rawn lut a, an sawi ang ngeiin a thiam a, Benfica goal nawr leh counter attack a hlauhawm sawt.

United keeper Lindegaard a rim malh malh hle a, Nolito leh Emerson te shot ropui tak takin a lo dang. Chelsea nen an intum hunah de Gea aiin a khel zawk angem? Midfield-a tam zawk Benfica in inkhel an thunun chhunzawm a, Nani leh Hernandez te lo lut mahse a tawp thlengin United a bet zawkah an ṭang. Minute 87 a Nolito thun loh chu uihawm tak a ni.

A tawp thlengin goal dang a luh belh lo a, inkhel pumpui thlirin United lamin point 1 an hmu thei hi an lungawi viauin a rinawm.

DINAMO ZAGREB 0 -1 REAL MADRID (Di Maria 53′) 

La Liga club Real Madrid chu Dinamo Zagreb khelmualah an zin a, 1-0 in an chak. Hei hi Zagreb tan kum 2011 a home game an chak loh hmasa ber a ni.

Zagreb hian bul an ṭan ṭha viau a, mahse Madrid tlarhmaa awmte an tlangtir leh pulh ṭhin. Ronaldo leh Oezil ten chance an neih an hmang ṭangkai lo a, Benzema chuan goal bar a pet per bawk. First half-ah goal a lut lo.

Second half ṭan hnu lawk, minute 53 ah Angel di Maria chuan he game a goal awmchhun hi a thun a, penalty box dinglam sir aṭangin goal ‘mawi tak’ a thun a ni. Zagreb hian a tawp lamah nawr ve mahse goal hlauhawm an nei hleithei meuh lo. He inkhelah hian Madrid left back Marcelo chuan red card a hmu bawk.

INKHEL DANG

Bayern Munich an chak a, Kroos leh Rafinha te goal hmangin Villareal 2-0 in an hneh. Bayern hi Group A hmahruaitu an ni zui. San Siro ah Inter Milan an chak lo a, Turkish club Trabzonspor an hneh lo a ni. Tunhnaia che buai angreng tak Inter hi an fans ten an boo hial.

FC Basel in 2-1 in Otelul Galati an hneh a, Ajax leh Lyon te goal thun loin an inhnehtawk. Lille leh CSKA Moscow te 2-2 in an inhnehtawk bawk.

Inter Milan 0 -1 Trabzonspor (Ondrej Celustka 76′)

FC Basel (Fabian Frei 39′, Alexander Frei 84′) 2 -1 Otelul Galati (Marius George Pena 58′)

Lille (Moussa Sow 45′, Benoit Pedretti 57′) 2 -2 CSKA Moscow (Seydou Doumbia 72′, 90′)