Nizan zanlai inkhel ah Spanish club leh Europa League champion lai Atletico Madrid chuan UEFA Champions League champion lai, Chelsea chu 4-1 ngawt a sawp in UEFA Super Cup an chawi a (UEFA Super Cup hi Champions League leh Europa League champion te’n an khel thin). He inkhel ah hian Atletico Madrid thiampuipa leh an in nghahna, Ramadel Falcao chuan hattrick siam in Miranda chuan goal khat a thun ve bawk a. Chelsea lamin an ‘zahzel ah’ Gary Cahill hmangin goal khat an thun ve hram.

Tute nge khel?

Atletico Madrid: Courtois; Juanfran, Godin, Miranda, Filipe Luis; Mario Suarez, Gabi; Adrian (Rodríguez 56′), Koke (Raúl García 81′), Arda Turan; Falcao(Belözoğlu  87′).

Referee: D. Skomina‎

Inkhel an tan, Chelsea ‘buaina zakhua’  Falcao!

Chelsea leh Atletico Madrid te hian formation in ang chiah 4-2-3-1 ve ve rawn hmang in, Monaco a inkhel hi mipui 14312‎ ‘lekin’ an en. Inkhel an tan a, tan atangin Atletico Madrid lamin bul an tan fuh zawk a, minute 6-na lek ah Flacao chuan goal a thun nghal. Adrián thawhrah sengin Peter Cech a ‘chip’ khum a, a goal a class kher mai. Chelsea lamin in siamrem tum mahse minute 19-na ah Falcao hmangin Atletico lam bawkin goal an thun leh. He goal hi a hma aiin a class a sang a, goal chunglam kilah mawi lutukin a pet lut a ni. Chutih rualin he goal hi Chelsea defense tihsual vang pawh a tih theih.

Atletico Madrid lam an phur tulh tulh a, goal hlauhawm Chelsea lamin an nei thei meih lo. Chelsea in 1^st half tawp vat vat se tia an duhlai takin hun tawp dawnah an hliamah Atletico lamin ‘chi an tat’ leh hram a, Falcao bawkin thun in a hattrick-na goal ani bawk. He goal hi Arda Turan-in a siam sak a, goal dang luh belh awmlo in chawlhlawk an hmang.

Chelsea beiseina tibo tu 2^nd half

2^nd half an tan leh ta cheng a, Chelsea in khel thalo Ramires la chhuakin Oscar an rawn luhtir. In siamrem an mamawh em em lain goal dang minute 60-na ah an chhuah belh leh a. He goal hi Miranda thun niin, Chelsea tan beiseina a bo tawh. Chlesea lamin ‘inthlahrung takin’ minute 75-na ah Gary Cahill hmangin goal an thun ve hram a. He goal an neih hnu hian tlemin an game a rawn tha chho a, an fans te’n “5-4 in kan chak dawn” tiin an lo au bawk mahse hei hian awmzia  anei thei vak tawh lo. Atletico lamin goal nawr an tum tawh lo a, Chelsea tan tan a har tawh a, hun a tawp meuh chuan 4-1 in Atletico lam ah chak ta a ni.

Inkhel tlipna

Zanin ah Atletico lam an khel tha zawk, chak phu zawk an chak ti ila a sual lo. 1^st half chhung zawngin Falcao an dang hneh lo a, Chelsea defense a pherh em em a, an tuar ta a ni. Roberto Di Matteo-in nikum lamah ropui takin Chelsea UEFA Champions League leh FA Cup a lakpui a, season bul tha takin a tanpui bawk a, mahse an champion leh theihna hmasa berah a naute a tlawhthluk pui ta. Atletico Madrid hi kum 2010 ah Inter Milan 2-0 a hnehin UEFA Super Cup hi an lo chawi tawh a. Kumin a an chawi nawn leh thei hian an team that zia a pholang ti ila a sual awmlo e.

Di Matteo chuan “Bul kan tan fuh lo a, minute 20 chhung lekin goal 2 kan chhuah a, kan game-ah kan lut thei lo. Atletico Madrid an khel tha a, a bikin Falcao kha hmunawl kan pe hnem lutuk. Ani ang player tha chu hmunawl pek tam chi ani lo” ati. Chutih rualin Atletico coach Diego Simeone chuan Falcao chungchang sawin in “Zanin ah Falcao khelh that dan kha sawifiah thiam theih pawh ani lo. Alak a kan beiseina a san poh leh a khel tha ani mai. Pressure hnuaiah pawh mamawh ang takin a khel thei ani” tiin an fachuam Falcao chu a fak hle.