Thawhtan zan Premier League inkhel awmchhunah hmahruaitu leh champion lai Manchester United chuan Blackburn Rovers 2-0 a hnehin, an hmahruaina chu point 5 laiin an zauh ta a. Premier League-a vawi 20 an champion-na an hnaih tial tial. He inkhelah hian United striker-ten goal an khung thei lova, mahse an winger tlan chak pahnih Antonio Valencia leh Ashley Young-te an che thung a ni.

Beisei ang ngeiin United hian an hmelma leh an elpui Manchester City chetsual hman tangkai tumin an rawn nawr nghal a. Mahse Blackburn hi an tang thei ve tlat a. United player-te an dangchat a ni mai lova, Blackburn hian chance tha tak tak an nei ve nual zawk a, first half-ah hian United goalkeeper David De Gea che tha fe lo se chuan Blackburn hian goal hnih tal chu an khung ngei ang.

A tir lamah United hian chance an nei nghal a. Javier Hernandez chuan Wayne Rooney pass lain, goal post a pet per dawt a. Valencia cross tha lutuk chu pawh khaih zeuhvin, Blackburn goalkeeper Paul Robinson chuan engtin tin emaw a dang thei hram.

United-in an nawr a, Rovers-in an dang a ni deuh ber a. Mahse minute 17-naah Rovers attack a hmuhnawm a, yard 20 atangin Junior Hoilett chuan kawh zetin a shot a, De Gea’n a nam chhuak hram. Hemi hnu pawh hian Marcus Olsson-a shot tha tak chu De Gea hian a nam per hman a, hemi vanga corner-ah pawh Grant Hanley head, goal ngei tawh tura lang chu De Gea hian a lo dang leh bawk a ni.

United tlar hma ding lam atangin Valencia chuan a cross tha thei hle a. Blackburn lama a nawr phei apiang chu a hlauhawm a ni ber mai. First half-ah goal a awm lova. Second half-ah Robinson a buai nghal a. Rooney leh Rafael-te shot a dang nalh hle a. Lehlamah De Gea pawhin Morten Gamst Pedersen-a free-kick a dang lo teuh khawp mai.

Sir Alex-a’n Hernandez leh Jones lachhuakin, Danny Welbeck leh Ryan Giggs te a luhtir a, mahse goal a lut nghal mai chuang lo. Hun tawp nan minute 9 a la awm tihin Valencia chuan box-ah ball a khalh lut a, Robinson-a man hman lohva petin goal a khung a. Hemi hnu hian Paul Scholes thlatu Young chuan finishing tawih zet hmangin goal a rawn khung leh a ni.

United hian kumin January thlaa Newcastle an hneh loh hnu khan chak loh an la nei leh miah lova, point 33 hmuh theihnaah point 31 an hmu a. Tunah hian game 7 khelh tur la awmah City aiin point 5 in an sang tawh zawk a. United hian City tih loh chu club huphurhawm vak khelh tur an nei tawh lova. City erawh hi cuhan Arsenal, United leh Newcastle te an la nei a, United hi an champion leh dawn a tih theih tawh mai lo’ng maw?