UNITED IN POINT HNIH AN HLOH

Estimated read time 2 min read

Manchester United chuan an khelmualah hnehna an chang zo lova, mikhual Leicester City nen goal khat ve ve khungin an in hnehtâwk.

Season thara UEFA Champions League khelh tum United hian goal an chhuah hmasak zet hnuah Fred hmangin si an phur hnu minute 3-na lekah an si phur an sût a.

Foxes lamin James Maddison hmangin goal khung leh mahse an goal khatna khungtu Kelechi Iheanacho chuan Raphael Varane a lo tih tluk avangin VAR in Brendan Rodgers-a nau te goal khung a sût sak a, hun tâwk thlenga goal a luh belh tâk loh avangin Old Trafford-ah mual neitu leh mikhualten point an insem ta a ni.

Table-a parukna ni chhunzawm Red Devils hi an midfielder hlui Owen Hargreaves chuan point khat an hlawhchhuak thei chu an vannei hle ni a sawiin Leicester City khân chak an phû zâwk niin a sawi a. Hei hi thil dik a nih theihna lai chu David De Gea in Wesley Fofana tauh a lo ben per hman te kha United vanneihnaah a ngaih theih ang a. Khatiang anga hna hautak lutuk Kasper Schmeichel-a’n a lo nei êm êm si lo bawk nen ‘United an vannei’ ti a sawi an awm a nih pawhin thu pawm theih tak a ni ngêi ang.

Ralf Rangnick-a teamte hian khelh 30 ah point 51 hmu in an chunga awm Arsenal leh Tottenham Hotspur te aiin an khêl tam a. Palina a awm mêk Arsenal hian khelh 28 ah point 54 an hmu a, Tottenham Hotspur hian khelh 29 ah point 51 hmu in United aiin goal difference-a an sân avangin 5-na dinhmun an luah a ni.

Leicester City hian zanina point khat an hmuh avangin 9-na dinhmun an luah ve leh chiah a. Anni aia khelh hniha khêl tam West Han United chu point 48 hmu in 8-na an ni a, Foxes aia khelh hnih vêka khêl tam Aston Villa chu point 36 hmu in 10-na an ni ve mêk bawk.

United hian karleh Inrinni-ah tlâk hlau Everton chu Goodison Park-ah an luhchilh dawn a, Leicester City hian Pathianni-ah Crystal Palace an lo mikhual ve thung dawn a ni.

Manchester United 1-1 Leicester City (FT)
MUN: Fred 66′
LEI: Kelechi Iheanacho 63′

You May Also Like

More From Author