USA a football thuneitu sâng U.S. Soccer Federation chuan USA national team coach thar atan Jurgen Klinsmann a ruat. Klinsmann hian USA coach hna kum 5 chhung lo chelh tawhtu Bob Bradley a thlak dawn a ni.

Tunge Klinsmann?

1990s chho vela Germany striker hlauhawm ni thin Jurgen Klinsmann hi a inkhel kan hmu mumal lo a nih pawhin a hming tal hi chu kan hre ṭheuh awm e. Vfb Stuttgart, Inter Milan, AS Monaco, Tottenham Hotspurs leh Bayern Munich ah te a khel kual tawh a, a khelhna apiangah goal thun thei tia hriat lâr a hlawh zel bawk. FIFA World Cup 1990 a Germany champion team ah a tel a, UEFA European Championship 1996 ah Germany a champion pui bawk. Euro 1988 atanga World Cup 1998 thlengin, major tournament-a a telna ah goal a thun vek nghe nghe a ni.

German national team a lo enkawl tawh thin a, 2006 World Cup khan pathumna a nihpui nghe nghe. Kum 2008, July thla-ah Bayern Munich a enkawl ṭan a, club hotute nen an thu a inhmu lo a, kum khat a thawh tlin hmain a chhuahsan.

July 29, 2011 (Zirtawpni) khan USA national team a enkawl tur thu hi U.S. Soccer Federation chuan an puang a, President Sunil Gulati chuan thuchhuah a siam nghal. “Coach thar atan Klinsmann kan ruai thei hi kan lawm em em a ni. Player leh coach a nih lai pawha chawimawina tam tak lo dawng tawh a ni a, tawnhriat a ngah tawh a, a football hriatna hian hmalam panin min kalpui ang tih kan ring a ni” a ti. Klinsmann pawh a lawm a, US national team enkawl a châk tawh thu leh a phúr thu a sawi.

Klinsmann hna hmasa ber hi a awlsam dawn lo a, August ni 10 a Mexico nen an inkhelh hun tur atan inbuatsaihna a kalpui nghal a ngai dawn. Player ropui hi coach ropui ni thei tak ang maw.