VARDY ROPUI ZANAH CITY AN NAWI

Leicester 4 – 2 Manchester City FT
Lei : Jamie Vardy 2′,21′, 78′, Andy King 4′
Man : Kolarov 82’, Nolito 90’

Zanina Premier League khelhah champion lai che chhe zui tak Leicester City chuan an mikhual Manchester City lakah that an chhuah duh lo va, point sem ve duh lovin kut ruakin an haw tir.

Inkhel tan atanga minute 5 chhung lekin the Foxes hian goal 2 an thun hman a, hei hi Manchester City in October 2006 daih tawha Wigan Athletic laka minute 5 chhunga goal 2 an chhuah hnua minute 5 chhunga goal an chhuah leh hmasak ber a ni nghe nghe.

Jamie Vardy chuan Premier League a minutes 741(game 10) chhung zet goal khung lo va a awm hnuah second 120 a liam awrh tihin goal hmahruai a thun a, minute 2 hnuah Andy King chuan a chhunzawm leh!

Beisei loh zawkin an khelhthat chhunzawm zel, minute 21-naah Vardy chuan City keeper Claudio Bravo paltlangin an goal thumna a thun leh! Pep Guardiola team atangin chawlhlawk hmain chhanna a awm thei lo.

Ball chan tam lam a ni lo, goal thun tam lam a ni zawk. Leicester hian first half-ah 24% chiah ball an chang a, amaherawhchu goal zawnah vawi 4 lai an pet thei a, 76% ball changtu City hian goal zawnah an la pet lo thung

Second half-ah pawh City tan defender Stones chu lungbang anga rintlak a ni thei ta chuang lo va, a tihsual nang chingin Vardy chuan angle zim tak atangin goal a thun, hat-trick a siam.

City tan chhuanlam siam bak tih tur a vang a, Aguero leh Fernandinho khel thei lo mahse player hming langsar hlirin an la kuh tul lawi si. Aleksandar Kolarov chuan free-kick atangin zangnadawmna goal a thun a, hun tawp hma lawkin an mualpho zualpui khuh turin Nolito chuan goal a thun ve leh bawk.

King Power Stadium-ah Manchester City in chakna reng an nei lo va, manager ropui a sawi Guardiola a hawi lawl lawl. Tun tum hi a kaihhruaina hnuaia Man. City a zawn a league-a an tlawm hmasak ber a ni a, league leader Arsenal chu point 4 in an phak ta lo bawk.
Beisei ang result nei hlei thei lo Leicester chu point 16 hmuin table-ah 14-na an ni ta bawk.

Inkhel pumpuiah Man. City hian 78% ball an chang a, minute 70 chhung Leicester goal zawna pet thei lovin a pumpuiah goal zawnah vawi 4 chiah an pet, corner erawh vawi 11 zet an hmu. Ball 22% changtu the Foxes hian goal zawnah vawi 6 an pet thung a, corner vawi 3 chiah an hmu thung.