VAWIIN ATANGIN I-DAY FOOTBALL; INKHEL A HMUHNAWM NGHAL DAWN

Great Sports Independence Day Cup 2017 chu vawiin atang hian Rajiv Gandhi Stadium-ah khelh tan a ni dawn a, Mizoram Premier League club pariatte bakah Rhino Charge leh AIFF U-19 te’n thiam ber nih an inchuh ang.

Inkhel hmasa ber chawhnu dar 1:00 ah champion lai Aizawl FC leh 2015 finalist Bethlehem Vengthlang FC an inhmachhawn ang a, chawhnu dar 3:00 ah nikum finalist Ramhlun North FC leh 2014 champion Dinthar FC te’n an khel ve leh ang. Inkhel en man hi cheng 30/- chauh a ni.

Group A – Aizawl FC, Bethlehem Vengthlang FC, Dinthar FC, Ramhlun North FC, AIFF U-19

Group A-ah hian vawiin a inlan tur team pali te bakah AIFF U-19 an awm a, anni hi nikuma kan hmelhriat tawh te kha an ni. Mizo panga – Edmund Lalrindika, V.Lalengzama, Zonunmawia, B.Lalnuntluanga leh R.Lalliansanga te an kawl a, I-League a goal thun thei naupang ber Baoringdao Bodo an nei bawk.

MFA Super Cup khelh zawh takah Bethlehem Vengthlang leh Dinthar bakin quarter-final an lut zo lo a, tun tournament hi club dangte tan an hmingchhiat khuh bona remchang tak a ni thei ang.

Group B – Chhinga Veng FC, Chanmari West FC, Chanmari FC, Mizoram Police, Rhino Charge

Inelna hnuhnung ber MFA Super Cup-a an chet dan en chuan Group B lam hi an tawh khirh deuh zawk dawnin a ngaih thei a, mahse football-ah chuan engkim thleng thei a ni. MFA Super Cup khelh zawh taka champion Chhinga Veng, finalist Chanmari West, I-Day champion hlui pahnih Chanmari FC leh Mizoram Police te hi eng team tan mah tum chakawm an ni ngai lo.

Sipai team Rhino Charge-ah hian  PC Rema, Joshua Varte, RL Puia, Lalneihkima, Jessy Sailo, Lallianzama, Lalrinpuia, Lalneihkima, Lalhmangaiha, Hmingthansanga, Zonunsiama leh Joseph Lalrinawma te an awm a, ‘Mizo team’ tih theih an ni. Anni hi Mizoram bakah state pawna tawnhriat nei tha tawh tak tak, Mizoram aiawha khel tawh vek an ni.

Lawmman lam

Kumin I-Day Football champion hian Rs 1,00,000 an dawng dawn a, pahnihnain Rs 50,000 an hum haw thei bawk ang. Top Scorer leh Best Player lawmman siam a ni a, Rs 3,000 ve ve an dawng dawn.

Semifinalist pahnihin Rs 10,000 an dawng ang a, inkhelh apiangin a chak zawkin Rs 3,000 dawngin a chak loin Rs 2,000 an dawng ang a, an inhnehtawk a nih chuan Rs 2,000 ve ve an dawng thung ang.