VAWIIN KA PIANCHAM (David Beckham)

Vawiin hi England footballer zinga boruak nei lian bera thin David ‘Robert Joseph’ Beckham-a pianchampha-phak a lo ni reng mai, kum 42 a lo tling ve ta.
.
May 2, 1975 khan Leytonstone, London, United Kingdom-ah a piang a, a naupan lai hian an khaw club Leyton Orient bakah Norwich City leh Tottenham Hotspur-ah te a lo trial tawh a, Tottenham hi a khelh hmasak berna club a ni.
.
Hemi hnu July 8, 1991 khan Manchester United panin Ryan Giggs, Gary Neville, Phil Neville, Nicky Butt leh Paul Scholes te nen naupang enkawl thiama an sawi hat Eric Harrison chuan a hrual a, a bak chu sawi lohva lum a ni tawh.
.
He nau hian 1992 khan kum 17 mi lek niin Manchester United tan bul tanin Preston North End, Real Madrid, Milan, LA Galaxy, Paris Saint-Germain tan a inlan chhunzawm. England, Spain, United States leh France league-ah a team te a champion pui vek a, English zinga hetiang ti thei hmasa ber a ni.
.
May 2013 khan kum 20 chhung zet rim taka a khelh thin football chu chawlhsanin a inkhelh chhung hian trophy 19 zet a chawi hman a, amaherawhchu, khawvel huap mimal chawimawina sang a dawng lo thung.
.
A passing dik lutuk, a cross ball tha lutuk leh free-kick pet thiam vangin a lar vet vet hle a, hairdresser Sandra Georgina fapa tih takah ding leh vei hawi zawnga a sam a’n vaw thlu hnap te chuan a zuna uai a tina zual. A bahsam awnna lam apiangah khawvel thalaite an awn a, a sam vuak thlukna lam apiangah nula an thle dual thin.

1998 World Cup last 16 a Argentina nena an inhmachhawn tumin tuna Atletico Madrid manager ni ta Diego Simeone hian a ti tlu a, Beckham hian Simeone chawnah tlu chunga a tlawh zeuh avangin red card a hmu a, England an chak lo zui a, an fa chuam an chhuan em em an sel zui nasa hle a nih kha.
.
Player discipline chhia erawh a ni lova, a inkhelh chhung zawng khan red card 7 hmuin hei hi match 60 dan zela red card 1 hmu ang chauh a ni.
.
Mual chhunga a lar tluk zetin mual pawnah pawh a lar a, a hunlaia khawvel mipaten chilthli tla duah duah an thlir thin Spice Girls member Victoria Adams nen kum 1999 khan an innei a, a larna a belhchhah hle.

A hmelin a zir avangin a inkhelh lai ata tawh mual pawn atanga sum lakluh lamah a sang fal a, a inkhelh tirh atanga Adidas ballboot hlir bun thin hian kum 2003 khan Adidas nen hian dam chhung daih inremna ziakin he company siam thawmhnaw a inbel aving ringawt hian $160 million a hlawh dawn.
.
A bak lakluhna a la nei nual a, tarlan vek sen erawh a ni lo. Inkhelh a chawlhsan hnuah pawh a lakluh hi a la sang hle mai a, kum 2016 khan nitin £71,000 la lut ziah anga chhut niin a sum neih hi £280 million nia chhut a ni bawk. An chhungkaw hlutna hi $771 million niin an la chhut leh ta zel.