VAWIIN TLAIAH KOLKATA DERBY

Vawiin tlai dar 4:30 hian Siliguri a Kanchenjunga Stadium-ah Kolkata Derby khelh a ni dawn a, team pahnihte inbuatsaihna in a vawrtawp a thleng tawh. He inkhel hi TEN2 ah ‘live’ a ni ang.

TEAM PAHNIHTE DINHMUN

Tun season I-League ah Kingfisher East Bengal leh Mohun Bagan te hi hneh loh la tawng lo awmchhun an ni a, table-a dinhmun sang pahnih luahtu an ni bawk. Trevor Morgan a naute hian game 7 khelin vawi 6 hnehna an chang a, tum khat an draw. An khingpuite lamah goal 17 thunin goal thum chauh an la chhuah a, an goal difference chu 14 a ni.

Sanjoy Sen a naute hian game 6 khelin vawi nga chakin vawi khat an draw a, an khingpuite lamah goal 12 thunin goal thum bawk an chhuah a, an goal difference chu 9 a ni.

I-League bikah team pahnihte hi vawi 18 inhmachhawn tawhin Mohun Bagan in dinhmun tha zawk changin vawi ruk hnehna an chang a, vawi nga erawh chak zawk an awm lo thung. Team pahnihte inhmachhawn hnuhnun ber khan East Bengal hian 2-1 in hnehna an chang.

Chhinchhiah tlak te :

  • Kolkata Derby hi kum 1921 atanga khelh tan niin tun hi a tum 359-na tur a ni.
  • Mohun Bagan striker Daryl Duffy hian tun season ah game 7 khelin goal 6 a thun tawh a, Jeje Lalpekhlua’n game nga khelin goal 4 a thun a,  an player pawimawh an nih a rinawm. Chutiang bawkin East Bengal atangin Wedson Anselme leh Wilson Plaza te’n goal 5 ve ve an thun tawh.
  • East Bengal player Mehtab Hossain hi a inlan a nih chuan Kolkata derby vawi 54 a khelhna tur a ni ang.
  • Kolkata Derby ah a vawikhat nan Haitian pahnih an inhmachhawn dawn a, Mohun Bagan lamah Sony Norde a awm a, East Bengal in Wedson Anselme an kawl bawk.
  • India coach Stephen Constantine chuan he inkhel hi a hmunah a en dawn a, tunhnaia inhliam vanga national team a tel ngai lo East Bengal captain Lalrindika Ralte leh Robin Singh te tan khelh that lehzual a pawimawh ang.
  • East Bengal hmatawng Robin Singh hian Kolkata Derby ah goal nga a thun tawh a, tun hnai kum 10 chhunga Indian player zinga goal thun tam ber a ni.
  • Mizo player zingah hriat theih chinah S.Malsawmtluanga leh Lalrindika Ralte te’n Kolkata Derby ah hian goal an thun tawh a, goal naran ni lo in goal pawimawh leh ropui bik an thun.