Lalbiakliana Memorial MFA Super Cup khelh mekah vawiin tlai dar 3:00 hian Chhinga Veng FC leh Chanmari West FC te’n final an khel dawn a, tualchhung football ngainatute tan Lammual pan chawt mai tur a ni ! He inkhela a chak zawk hian cheng nuaih hnih (Rs.2,00,000/-) leh sumin a lei zawh loh hmingthatna an hawn ang a, a chak lo zawkin cheng singriat (Rs.80,000/-) an hum haw ang. Inkhel en man hi Rs.30/- chauh a ni a, hei hi nepnawi lei nan i duh a nih chuan school uniform ha la a thlawnin i lut a ni mai.
Final kalkawng
Mizoram football-a knockout competition-a sum tamna ber kumin MFA Super Cup-ah hian team 63 an tel a, pahnih chauh an chuang tawh a, a tawpah erawh team pakhat chauh an dingchang dawn. Chhinga Veng hian an coach thar Lalsangzuala Hmar enkawlna hnuaiah an match hmasa berah Zarkawt FC 9-0 in an sawp a, hemi hnu hian Zo Dreams FC (14-0), Chawnpui FC (14-2), MPL club Bethlehem Vengthlang FC (1-0) bakah semi-final ah Venghlui FC (3-2) te hnehin final hi an lut. An kalkawngah hian goal 41 thunin goal 4 an chhuah.
HC Zarzoliana enkawl Chanmari West FC hi nikum MFA Super Cup-ah khan first round-ah an tla nghal a, kumin erawh fiahna hautak paltlangin final an lut. Lungleia inbengbel SYS Academy (3-1) an hneh hnuah Kanan FC (3-0) an an hneh leh a, round of 16-ah Electric Veng club Zauva Memorial FC (15-0) lakah harsatna an tawk lo. Hemi hnu hian MPL club tha pahnih Dinthar FC leh Mizoram Police FC te lakah hna an ngah a, hun pangngaiah 1-1 ve ve a an inhnehtawk pui hnuin penalty shootout-ah a vannei zawkah an tang ve ve. Final an luhna kawngah goal 23 thunin goal 3 an chhuah thung.
The Team !
Chhinga Veng FC hi nikum MFA Super Cup-ah khan Round of 16- ah Mizoram Police FC hneh lo in an tla a, kumin final-ah erawh MPFC hnehtu Chanmari West FC hmachhawn turin an tha tawk. Mizo zinga coach hlawhtling ber pawl Lalsangzuala Hmar an nei a, Santosh Trophy a Mizoram coach Sanga an neih miau avangin season tawp rualin player an zawng tawh a, an banphaka awm apiang an pawt lut emaw tih tur a ni.
Season hmasaa an buaina siban nghak turin tualchhung football-a tawnhriat nei tha T.Mawia an kawl a, tlarhnungah captain Rinchhana leh a thiante an nghet tlat. Khelmual laia ball sem turin MPL2 Best Player MS-a leh Mizoram midfielder Rinchhana an nei a, winger tha pahnih Dampuia leh Dingngheta te hi eng team tan pawh hmachhawn chakawm an ni lo. An midfielder te ball sem goal-a lo thun turin Mizoram tana khel pha thiau – Sawmfela, Dawngtea, Apuia leh inhliam vanga inlan thei rih lo Mapuia te an nei ! Player tha an kawl tam avangin team dang player tur an neih sak a, an hlawkpui tih chu Bethlehem Vengthlang FC goal khata leka an hneh tum pawhin a lang.
Chanmari West FC tana fimkhur ngaihna tur chu CVFC player te goal thun thei lutuk hi a ni. Final an luhna kawngah CVFC player 15 in goal an thun tawh a, an zingah hian defender pali an tel. Chhingcows hi an tha a, chutih rualin an that avangin pressure an ngah let ve thung, semi-final a first division team Venghlui FC nena an inkhelh tum anga goal hnih an chhuah nawn a nih chuan an buai khawp ang.
West Warrior hi tun season-ah team vantlang ni tura ngaih an nih laiin MPL club pahnih ngawt an petchhuak thei a, CYMA Football-a Ramhlun South champion pui zo hlim HC Zara naute hian Super Cup nomawi hi an chawi thei ngat a nih chuan an club boruak pawh a vawrhsang hle tura ngaih a ni. An hmatawnga ding Lalnunmawia leh Vanlalthlamuana te unau an tangkai a, Shillong Lajong atanga an lakluh Jacob Lalrawngbawla a langsar bawk. Tlarhnungah defender tawnhriat ngah Ronald Zothanzama’n amah duh lotu Chhinga Veng a hmachhawn dawn a, a awrawl a rin ang bawkin chak duhna thinlung pawh a nei lian khawp ang.
Final an luhna kawngah Jacob-a kawppui Lalromawia leh Mizoram Police an hneh tuma man of the match ang hiala sawi theih Lalremruata hming lam hmaih a thiang lo a, semi-final-a an player tangkai Calvin Zosiamliana an chhawr thei lo tur erawh CVFC tan kut benna tham a tling. Chutih rualin rawlthar rual huaisenna leh vanneihnaa thuam an nih miau avangin Chhingcows tan ngaih tih that ngawt a thiang lo.
Top Scorer sawi fel ni
Chhinga Veng FC striker Sawmfela’n goal 8 a thun tawh a, Quarter-finals a BVT FC lakah goal a thun lo tih loh chu an khingpuite lamah goal a la thun ziah. Ani bakah MPL5 Top Scorer Dampuia’n goal 7 thun tawhin Super Cup a goal thun hnem ber ni thei turin hun tha a la neiah a ngaih theih.
Chanmari West FC lamah Lalnunmawia’n goal 9 thun tawhin Ramhlun South tlangval hian an team pumpui goal thun zaa 40.9 (40.9%) zet hi a ke atanga chhuak a nih avangin Chhingcows defender te tan ven uluk a tul ang.
online cialis
generic cialis
Canadian healthcare viagra
Best price for viagra