Spain coach Vicente del Bosque chuan FIFA ranking-a pahnihna Netherlands leh pathumna Germany te chu UEFA Euro 2012 a an elpui ber tur an nih thu a sawi.

German magazine Kicker in an interview na-ah del Bosque chuan, “World Cup leh a hnulama an khelh dan enin, team dang zawng zawng aiin Netherlands  leh Germany te hi an huphurhawm berin ka hria. Anni hnungah hian team pali an la awm a, Portugal-ah hian khawvela player ṭha ber pakhat (Cristiano Ronaldo) a awm a, tin, team solid tak an ni bawk.” a ti.

Kum 61 mi del Bosque chuan Euro 2000 champion France chuan siamtharna an chang niin a sawi a, anni bakah hian England leh Italy te chu champion thei zing ami an ni a ti bawk.

Spain hian South Africa-a 2010 FIFA World Cup final-ah Netherlands hnehin an champion a ni tih kan la hre ṭheuh awm e. Hei mai a ni lo a, Euro 2008 ah pawh champion in, tun ṭumah pawh hian champion tura rinkai ber an ni.

“European champions kan nih angin, team pumpuiin kan kova mawhphurhna tla hi a sân zia kan hre vek a, kawng harsa tak paltlang tur awm mahse champion nawn a, international football khawvela team ṭha ber kan nihna humhim hi kan tum tlat a ni.” tiin Spain coach chuan a sawi.

Ukraine leh Poland a khelh tur Euro 2012 hi June ni 8 ah ṭan tur niin, July ni 1 thleng khelh a ni ang.