Aston Villa chuan Norwich City boss Paul Lambert chu an manager thar atan an lalut.

Kum 42 a upa Scot hian Scottish ve tho Alex McLeish chu a thlak a. McLeish kha tun season game tawp ber hnu lawkah Villa hian an ban a nih kha.

Lambert hi Villa-in kum hnih chhunga an boss 4 neihna a ni ta a. Norwich City hi League One atanga Championship a kaipui hnu season-ah Premier League a kaipui leh nghal a. Season liamta khan Premier League-ah pawh a vantlang zingah telin, 12-na an ni thei a ni.

Villa chuan thuchhuah siamin, “Paul Lambert chu Villa manager thar a ni ta tih kan puang thei hi Aston Villa Board-te kan lawm hle a ni,” an ti.

Paul Lambert hi player a nih lai chuan Celtic leh Borussia Dortmund-ah te khel thin a ni a. 2009 Agust thla khan Norwich hi a enkawl tan a, hetih lai hian Norwich hi League One-ah an la awm a ni.

Aston Villa hian an manager turin Lambert chu appoint mahse, Norwich nen hian inremna an la nei hlei thei lova. Norwich chuan an manager hi sezawl chhuah tawp an tum lova, Villa lamin pawisa pek loh dan an ngaihtuah ve thung a, Court lam lam te an sawiri tlat mai!

Villa hotute chuan kum khat liamtaa Lambert-a’n Norwich-ah contract thar a ziah khan, Premier league club dang nena inbiak phalsak a ni an ti a. Mahse Canaries (Norwich) hotute hian Villa leh Lambert-te inbiak hi an phalsak leh loh avangin an contract-a inremna an bawhchhia niin an sawi a. Lambert hian Norwich hotute thu zawm lovin banna a thehlut ta ringawt a ni.

Hetih lai hian Norwich chuan Villa hian Lambert an lakluh avang hian zangnadawmna pound maktaduai khat tal an dawng tur niin an hre ve thung a. Tuna a landanah chuan club pahnihte hian tlawm zawk nih an tum lo ve ve a, Premier League a inrawlh hial a ngaih an ring.

Hetih lai hian Norwich striker Grand Holt chuan a pu a zui maithei a, a chiang lo naa, mahse a beiseiawm khawp mai. Liverpool-in Brendan Rodgers an lakluh khan Swansea chuan, ‘kum khat chhung chu kan player-te lakchhuah i tum tur a ni lo,’ tiin thu an tiamkam a. Lambert hi chu Norwich hian an ti ve lo. Chuvangin, Norwich striker Grand Holt chu Lambert hian Villa lamah hian a chhawm phei ngei a rinawm a. Holt hi kum 31 a upa a ni tawh a, Norwich hian kum khat vak contract an ziahpui duh tawh lova, chutih laiin Holt hian kum thum dain contract a la duh bawk si a, an in-the-thu vel mek a ni.