WENGER: KHAWVELA ANALYSIS CENTER THA BER FIFA – AH DIN KA TUM

FIFA Chief of Global Football Development ni mek Arsene Wenger chuan khawvela analysis tha ber chu FIFA ah din a tum thu a sawi.

Arsenal boss hlui chuan he a thil tum chungchang hi sawiin, “Khawvela analysis center tha ber FIFA ah hian din ka tum a. Hei hi thil harsa tak a ni tih chu ka hria a, mahse FIFA World Cup 2022 ah chuan a hlawhtlinna hi in hmu ang. He kan analysis center hmang hian inkhel chungchanga hriattur pawimawh leh tangkai a chikim thei ang ber kan chhawpchhuah sak thei dawn che u a ni,” a ti.

Europe 1 in an kawmnaah French pachal kum 70 mi chuan football khelmuala lêt leh chu a rilruah a awm thin thu a sawi a. Club enkawl hna-ah a kir leh dawn em tih an zawhna chu, “Ka duh ang thlapa thil kalpui theihna a awm a nih chuan ka in ngaihtuah ang a, a nih loh chuan ka lêt tawh lo vang,” tiin a chhâng a ni.