British footballer zinga manto ber Andy Carroll chuan Ningani khan West Ham United chu kum khat chhung loan in a zawmfel ta.

Liverpool striker Carroll hi West Ham in lakluh an tum reng a, Carroll hian Anfield-a awm a, khelpha tura beih a duh avangin a chhuak duh lo a. Mahse manager thar Brendan Rodgers hnuaiah khelhna hun a chang thei lo a, Europa League qualifier-a Hearts nen an intum ṭum phei chuan squad ah a awm lo hrim hrim a ni. Luis Suarez bakah striker thar Fabio Borini a awm a, Bayer Leverkusen aṭangin kum 18 leka upa German striker Samed Yesil chuan Liverpool a zawm thar bawk. Hei vang hian Carroll tân Liverpool starting XI a tel beiseina a tlem tawh hle a, a khelh phakna tur West Ham United a chhuah hi a remti ta a ni.

Carroll chhuah thu hi Liverpool official website ah tarlan a ni tawh a, 2012-13 season chhung chu Sam Allardyce-a team (West Ham) ah a khelh tur thu an ziak. West Ham United pawhin Carroll an lalût thei chu lawmawm an tih thu an website ah an tarlang tawh a ni.

Kum 23 a upa Carroll chuan thuchhuah siamin, “West Ham ka zawm thei hi ka lawm a, inkhelh ka chak zek zek tawh a ni. Kei chuan inkhelh tam ka duh a, goal pawh ka thun nual ka beisei. Manager mai bakah player ṭhenkhatte nen kan inhre ṭha sa a, hmelhriat awmsa na hmuna lo kal hi ka tân pawh a thlamuanthlak hle a ni.” a ti. Sam Allardyce enkawlna hnuaiah Andy Carroll leh Kevin Nolan te hi Newcastle United ah an lo khel ho tawh ṭhin a nih kha.

Sam Allardyce pawh a lâwm a, “A tute tân pawh hei hi signing ropui tak niin ka hria. Andy hi ‘all-round footballer’ a ni a, feet 6 leh inchi 3 laia sang a nih vang hian boruaka a ṭhatna hi a langsar a. Hei vang hian mi tamtakin leihrula a thiamna te hi an hmuhhmaih ṭhin a ni. Goal a thun nual ka beisei a, season tâwpah Barclays Premier League-ah dinhmun ṭha tak kan neih theih kan beisei a ni.” tiin a sawi.

Dempsey leh Llorente?

Liverpool in Fulham midfielder Clint Dempsey lakluh an tum thu hi chu kan hre nual tawh ang a, tun thlenga an la lalut lo hi a mak zawk hial tawh a ni. Hetia Carroll a chhuah takah chuan (loan mah nise) Dempsey hian Liverpool a zawm ngei a rinawm.

Hetihlai hian Athletic Bilbao striker Fernando Llorente chu Liverpool in lei an tum tih thawm a awm ve reng bawk a. Hei hi thu belhchiandawl a nih leh nih loh chu hunrei lo te ah a hriat theih dawn a ni. Transfer khar hmain ni 1 chiah a awm tawh a, Clint Dempsey leh Fernando Llorente hi an lalût thei a nih ngat chuan ‘deadline day’ hmang ṭangkai ber an ni hial ang.