Half time a 0-2 a an chak loh zet hnuah Manchester United chuan second half ah goal 4 an thun a, 4-2 a West Ham United lehthal in Premier League hmahruaitu an ni chhunzawm zel. He inkhel ah hian Manchester United striker Wayne Rooney chuan hattrick a siam a ni.
First half ah Mark Noble.
Inkhelh tan atangin Man United in ball an chang tam zawk a, a khelh pawh an khel tha zawk. Goal hlauhawm nei lem lo a an nawr mek laiin Evra handball leh Vidic a tihsual vangin Man United in penalty vawi 2 an chawi a, Mark Noble chuan thun ve vein 2-0 in West Ham in hma an hruai der mai. Hemi hnu pawh hian Man United zawkin an nawr chhunzawm zel a, corner an hmu tlut tlut a, goal erawh a luh belh lo. Vidic-a’n Ba a pawhthluk vanga red card a hmu lo chu vannei tak a ni.

Second half ah Rooney a lo lang e
Second half a ni a, Hernandez leh Berbatov rawn lutin Man Utd in an nawr na sawt a, West Ham counter attack pawh a hlauhawm sawt. Minute 64 na ah Wayne Rooney a’n freekick kual nalh zetin a thun a, amah bawkin goal hnih dang a thun belh leh a, hun tawp dawnah Hernandez a’n thun ve lehin 4-2 ngawtin Man Utd an chak ta a ni. Rooney a ropui a, zam ve ngai lo Manchester United an ropui lehzual a, an champion kum a ni thei angem?
Sir Alex-a thluak
Blackpool laka 0-2 a an chak loh laia Rooney lachhuak a, Hernandez luhtir ngam kha a nia, West Ham Utd an hneh tum pawhin Sir Alex-a finzia leh huaisen zia kan hmu leh ta. Minute 46 na ah Evra lachhuakin Hernandez a luhtir a, Ryan Giggs chu left back angin a khelhtir. Tlarhnung atangin ball awmze nei a chhuah tam phah a, Rooney a free phah sawt bawk. A tir ah rem fuh chiah loh mahse inkhelh laiin thutlukna awmze nei tak tak a siam a, manager tha bik a ni a tih loh theih loh.
Man United midfield hi…
Manchester United chak loh na lai inzawt ila, midfield kan ti ngei ang. Tuna an midfielder te hi an chhe em em a ni lo a, mahse ball tlanpui a, lehlam defence thiat a, a lai atanga ‘killer pass’ siam thei an tlachham a ni. A sir atang hlirin an attack a, Valencia ten cross tha thei viau mahse lehlam defender heading ah an tha ve tho si a, a lai atanga ball lakluh an nei mang lo.
EPL champion nih an hnaih deuh deuh a, an defence tha leh strikeforce ropui tak hian an midfield pan tak hi a chhanchhuak zo tak maw?