West Warrior an lian zel

Champhaiah a vawi khat nan Mizoram Premier League Season 5 khelh a ni a, Chhangphut Field-a Aizawl FC hnehtu Chanmari West an la thiam reng a, Round 8 inkhel hmasa berah Ramhlun North 3-2 in an hneh.

Goal thum phawt
October 24, tlaia Lammuala inkhelah Ramhlun North FC chuan tha taka bultanin minute 10-na lekah David Lalrinchhana cross an lo dan per chu Chanmari FC atanga an lak thar Isaac Lalruatpuia chuan a thun a, Lunglei tlangval goal-in MPL kaithar a ti phur hle.

Amaherawhchu, tun MPL a team tha ber pawl Chanmari West-in a an zia an chhuah a, minute 16-naah Lamuanzuala chuan Laldampuia corner chu tha zetin a tauh lut a, an siphurh an sut. Chawlhlawk hmain Chanmari West an hlauhawm chhunzawm a, minute 45-naah counter attack a ball tha tak an hmuh chu H. Lallianzama ball vawrh luh chu Ramhlun North goalkeeper David Lalrinpuia aiin Laldampuia’n a la hmasa a, Chanmari West captain hian goal-ah pet zuiin keeper insiamrem tuma tlan let tan dan ngaihna a awm lo, goal mawi a ni.
Goal hnih dang
Chawlhlawk zawhah pawh Chanmari West an hlauhawm chhunzawm zel a, chutih laiin Ramhlun North an awm mai mai bik lo. Ramhlun North tan hian Zosangliana (Chhaia) chuan goal kham a pet per a, substitute Jerry F. Zonunsanga corner pet chu defender Lalmuanawma’n tha takin tauh mah se Chanmari West goalkeeper Lalruatpuia’n a dang tha hle.

Ramhlun North an insiamrem hnuah an kheltha zawk a, amaherawhchu an goalkeeper tihsual an tuar. Minute 76-naah keeper David-a ball petchhuah sual chu Muanzuala’n hmang tangkaiin Lengpui tlangval hian goal sir tha takah a pet lut. Ramhlun North tan Venghlui FC atanga an lakluh thar Lalremruata’n minute 90-naah goal khat khung ve mah se awmzia a awm tawh lo.

Ramhlun North lam hian minute 75-naah an goalkeeper David-a chu inhliam vangin an chan a, substitution an hman zawh tawh avangin defender John Lalduhawma chu goalkeeper atan hman a ni a, save tha tak tak a nei nual nghe nghe. Chanmari West winger Laldampuia chu man of the match atan thlan a ni a, Kawrtethawveng tlangval hian captain armband a hren ang chiahin mualchhungah team khaipa a ni.
ZoFooty Statistics:
Chanmari West FC 3-2 Ramhlun North FC
(Lalmuanzuala 16’, 76’, Laldampuia 45’) (Isaac Lalruatpuia 10’, Lalremruata 90’)
44% Ball Possession 56%
13 Shots 16
8 On Target 5
2 Yellow Cards 0
0 Red Cards 0
Powered by Rainbow Multibrand Mobile Showroom.

Tute nge khel?
Chanmari West FC: Lalruatpuia, Racy K Lalremmawia, Vanlalzuia Hnamte, R. Lalawmpuia, Toky Zomuanpuia, Lalmuansanga, Lalmuanzuala, R. Laldanmawia, Laldampuia, H. Lallianzama (PC Lalawmpuia 54’), Reuben Zosangpuia (K. Lalnunzama 64’).
Subs: Lalmalsawma Hmar, Calvin Zosiamliana, JH Lallawmkima, K. Lalnunzama, R. Lalremruata, Ramengmawia, Lalruattluanga, PC Lalawmpuia, Lalnunfela.
Ramhlun North FC: David Lalrinpuia, Lalramthlamuana, Lalruatfela (John Lalduhawma 62’), Lalmuanawma, Zosangliana Sailo, C. Ramdinmawia, David Lalrinchhana (Jerry F Zonunsanga 60’), Lalruatkima Dosel, Lalchhuanpuia (Lalremruata 46’), B. Malsawmzuala, Isaac Lalruatpuia.
Subs: Liansangpuia, John Lalduhawma, Ephraim, Lalchhanchhuaha Fanai, Jerry F Zonunsanga, Lalremruata.