West Warrior damna Dampuia, Lilzo-a’n Chhinga Veng natna a chawk – Rooney Opa

Kawrtethawveng tlangval Laldampuia goal hnih hmangin Chanmari West-in Chhinga Veng FC 2-0 in an hneh a, Mizoram Premier League Season 5 semifinal an lut.

West Warrior hma hian Bethlehem Vengthlang FC, Chanmari FC leh Aizawl FC ten knockout stage an lut tawh a, in bitum tur erawh a la hriat loh.

Ningani zan inkhel hi a pawimawh em avangin MPL5 Quarterfinal hming lem an vuah hial a, amaherawhchu Chhinga Veng lam an relegate loh vanga an lawm tawk avangin a hmuhnawmna tur ang a pawh pha lo.
MPL kaithar hotuten hian an natna chhawk turin Lilzo an sawm a, an ngui tur chawk hlim turin Triau Trackx vocalist Lalruatfeli an sawm. Chhingcows ten knockout stage thleng pha lo mah se inkhelh banah Chanmari West mipui nen Lammualah lamin an hlim a, MFA hriatpuina thlapa lam ni mah se phullem chhe tawh tak hian a that phah a rinawm loh.
Hmunruak pakhat
Team pahnihte hi semifinal hmunruak pakhat inchuh niin an inhnehtawk chuan Chanmari West hian semifinal an lut dawn a, a chak zawk an awm erawh chuan a chak zawk zawkin semifinal an lut ang.
En tlak fu
Team pahnihin tantu an nei tha bawk a, inkhel tan atangin game a nung thaw kha hle. Minute 10 chhung lek pawhin lehlam lehlam in auna tur an neideuh reng. Chhinga Veng winger Lalmuankima (MK-a) cross-in West Warrior defender kut a fuh niah Chhingcows-in an ngai a, referee hmun dah a dang.

Penalty shout awm hnu lawk hian Chanmari West-in an nawr phei ve nghal a; R. Laldanmawia, Ramengmawia leh Lalbiakhlua (Hlutea) ten an intih tur theuh an tih hnuah captain Dampuia’n a tawp a rawn khar – gol mawi bik a ni.

Chhinga Veng an buai phah lo a, MK-a shot tha zet chu West Warrior keeper Lalruatpuia’n (Mama) tha takin dang a, College Veng keeper hian save lo ngat se chuan inkhel kalhmang a dang ngei ang. MPL kaithar coach Chawngthansanga’n Services player Francis Zonuntluanga first half-ah hian a dah lut nghal a, MPL game rangah Leitan tlangval a langsar thei bik lo.

Red Card leh goal
Chhinga Veng mipuiin goal phur mah se Lammualah Lilzo leh Ruatfeli an chah luh avangin an ngui phah lo. Supporter-in chak an duh tawk lo a, player-te’n an theihna tak tak an lanchhuahtir loah a ngaih theih bawk.

Second half minute 54-naah Danmawia’n tha taka la lutin, Lalthlahlova’n (Patea) goal venhim a tumna lamah hnung lam atangin a tlawh tlu a, Chhinga Veng defender hi hnawhchhuah a ni. West Warrior captain Dampuia a rawn pet chhuak a, freekick hi goal-ah chantirin MPL5-ah goal 10 a khungna chiah a ni bawk.

Chanmari West-in an dinhmun a tha a, amaherawhchu striker Ramenga’n hun khawhral a tumna lamah an thlak hmain a shin guard a phawi a, yellow card vawi hnihna a hmuh avangin H. Lallianzama luh hun sawn tlai a ngaih phah.

Player 10 ve vein khel mah se Chhinga Vengin semifinal thleng turin goal thum an mamawh a, West Warrior lamin an goal venghim tura tlarhnung an rem phui ve tho avangin goal dang a luh belh tawh lo. Chanmari West-in hnehna changin semifinal an inhlangkai/
Faktlak Chanmari West
Chanmari West hian match hmasa pahnih an chak loh hnuah insiamthain result tha tak nei a, an team khel a hmuhnawmin winger Dampuia leh Danmawia an hmang tangkai thiam a, an squad chhah loh mah se player-te an inhrethiam tawn tih a chiang hle.

Semifinal lut thei tura hun tam an bawhpelh hnuah insiamthatna hun hnuhnungah an tho chhuak a, a saseh hun takah ZoFooty coach of the year tum hnih ni tawh HC Zarzoliana naute hauisenna a lang.

Chhinga Veng an vanduai
ChhingaVeng hi an vanduai a tih lohtheih loh a, season hun tam zawk an talbuai hnuah semifinal lut thei turin khawpin an insiamtha mah se match pawimawhah field chhung ngaihtuah loa field pawn lam an buaipui nasa lutuk an tuar.

Amaherawhchu, Chhinga Veng tantute tan lawmna tur a awm a, tla thei dinhmuna ding kha hahdam takin season an khar. Tunah chuan an tla thei tawh lo a, MPL6 atan ngaihtuahna an seng thei tawh ang.
Tute nge khel?
Chanmari West FC: Lalruatpuia, TokyZomuanpuia, Racy K Lalremmawia, VanlalzuiaHnamte, R. Lalawmpuia, Lalmuansanga, K. Lalnunzama, Lalbiakhlua, R. Laldanmawia, Laldampuia, Ramengmawia.

Subs: Lalmalsawma Hmar, Calvin Zosiamliana, Lalruattluanga, JH Lallawmkima, Lalmuansanga, Lalmuanzuala, H. Lallianzama, PC Lalawmpuia, Lalnunfela.

Chhinga Veng FC : R. Lalhmangaihzuala, K. Lalthlahlova, Lalramfelpuia, UgochukwuChigozie Emmanuel, R. Laldinliana, Vanlallawma, H. Lalmuankima, Vanlalthanga, Paul Ramfangzauva, MS Dawngliana, Joseph Lalnunpuia.

Subs: Lalfaktlinga, Ronald Zothanzama, Dinthangpuia, Joseph Biakthianghlima, Joy MrongKharRaswai, LalramlianaVarte, Francis Zonuntluanga, Lalthlamuana, Lalkhawpuimawia.
ZoFooty Statistics:
Chanmari West FC 2-0 Chhinga Veng FC
CWFC : Laldampuia 11’, 57’
MoM : Laldampuia, CWFC
46% Ball Possession 54%
8 Shots 14
4 On Target 4
2 Yellow Cards 2
1 Red Cards 1
Red Cards: K. Lalthlahlova (CVFC), Ramengmawia (CWFC)
Powered by Rainbow Multibrand Mobile Showroom