West Warrior leh BVT an intluk tawk – Zoa

Posted on December 1, 2016December 2, 2016 by ZoFooty

4 min read

Mizoram Premier League Season 5 semifinal hmasa berah Chanmari West leh Bethlehem Vengthlang te 1-1 in an inhnehtawk a, December 1 zan inkhelah inchhuang thei tur an awm lo.

BVT-in Armed Veng South tlangval Lalrammuanpuia (Apuia) hmangin minute ngana lekah goal khung mah se Chanmari West-in minute thum hnuah Laldampuia hmangin an sut a, goal dang a luh belh tawh lo. Kawrtethawveng tlangval Dampuia’n tun season-ah goal 11 khung tawhin top scorer a ni mek.

Semfinal hi minute 180 khelh tur a ni a, December 8 zanah minute 90 dang khelh leh tur a ni. Extra time a awm dawn loh avangin second leg-ah an inhnehtawk leh a nih chuan penalty hmanga chak zawk zawn a ni ang.

Goal khat ve ve
Boruak sang nghal phatah tlarhma lam an hriam a, tlarhnung lam an buai ve ve. Bethlehem Vengthlangin corner kick hmang tangkai nghalin Laldinlaian Varte corner pet chu vengtu nei lo Lalrammuanpuia’n (Apuia) chiang takin a tauh lut.

Minute thum hnuah BVT goalkeeper Malsawmdawngzela’n ball a control sual a, vanduaina belhchhah turin ball per chu Laldampuia zawnah tak a kal zui a, Chanmari West captain hian hian bel chhunga sa a hlah lo. Kawrtethawveng tlangval hian box pawn atangin BVT keeper Mala a pet khum a, minute 10 pawh tling loah 1-1 a ni.

Player ten ngai an awh a, chak loh hlohnaa an khah zui avangin team pahnih an fimkhur hle. West Warrior lamin BVT tlarhnung buai zeuh vangin H. Lallianzama hmangin goal hnih khung theihna tur an nei a, an hlah ve ve. BVT lam tan Ramhlun FC atanga an lakluh Lalnunmawia’n a hun tha neih a hmang tangkai bik lo.

Goal tel lohna
Second half-ah goal khung ngei tumin an innawr zui a, luh thut lu hai a reh tawh avangin goal chu sawi loh goal chance hmuh tur pawh a vang hle.

Minute 54-naah K. Lalnunzama’n (Valtea) hla tak atangin a ke hman thiam lam vei lam ngeiin kawh takin a pet a, BVT keeper Mala’n mawi takin a beng chhhuak. Minute 72-naah man of the match atana thlan Vanlalzuia Hnamte-in vei lam kil atangin cross tha bik a rawn nei a, BVT goalkeeper Mala’n man nghet thei lo mah se defender Lalhlimpuia’n hmun himah a pet chhuak.

BVT-in goal khung tumin PC Zosangliana, Laldingngheta leh Lalmawizuala te luhtir mah se inkhel boruak sangah danglamna an ni pha lo a, Chanmari West-in an player pawimawh R. Laldanmawia inhliam vanga an chan avangin an goal nawr a na tawk tawh lo bawk.

Ziaktu Ngaihdan
Inkhel bul tan atangin game a nung nghal a, goal a luh hnuah game tempo a dang daih a, inkhel hmuhnawm tih tur a ni lo.

Hun chanve hmalamah chuan Chanmari West game a duhawm zawk a, team thawkrim zawkin inkhel an thunun ti ila kan sawi sual lo ang. Lianzama a kheltha a, ball a ken theih bakah Dampuia leh Danmawia a tan hmuhawl a siam sak thiam a, Zobawk tlangval chevel a hmuhnawm. Defensive midfield a khel Reuben Zosangpuia leh Valtea ten defender hnen atangin ball an la hnem a, 4-2-3-1 formation thatna an hmang chhuak phaah a ngah theih.

Bethlehem VT lamin Apuia tauh goal tih loh chu first half ah thil ropui tak tih a nei lo. MPL5 semifinal match hmasa berah BVT attacking game a thi a ni ber. Tlarhnung pui tura awm Lalrintluanga (Tuka) leh Samson Ramengmawia ten an hna an tlin lova, first half-ah Chanmari West-in chak zawk an phu.

Second half bikah chuan BVT game a nung a, Samsona ball la turin a che tam a, striker Apuia’n chet velna tur a hmun tam hnuah inkhel a nung a, a hmawr bawk dan erawh a fuh chuang lo. Chanmari West-in Reuben-a thlak zo an neih loh an tuar a, game tempo ti rang tura beisei Reuben-a thlaktu Lalmuansanga’n a theihna tak a lanchhuah tir pha lo.

First leg-ah goal khat ve ve an khung a, dinhmun thak zawk an awm lo – chu miin chiang taka a lantir chu second leg a hmuhnawm dawn tih a ni. December 8, Ningani zanah final lut tur pakhat zawk a chiang dawn a, Lammual pawh a khat zo ngei tura ngaih a ni.

Tute nge inlan?
Bethlehem VT: Malsawmdawngzela, H. Lalhlimpuia, K. Lalmalsawma, Lalrammuanpuia, Hmingthanmawia, Laldinliana Varte, Lalrintluanga, Samson Ramengmawia, PC Laldinpuia, Lalnunmawia, Zothanpuia.
Subs: Lalmuansanga, R. Lalrinsanga, Lalhruaitluanga, B. Zothanmawia, Laldingngheta, Zosangkima, Lalmawizuala, PC Zosangliana, Lalzatluanga.

Chanmari West : Lalruatpuia, Toky Zomuanpuia, Racy K Lalremmawia, Vanlalzuia Hnamte, R. Lalawmpuia, Reuben Zosangpuia, K. Lalnunzama, Lalbiakhlua, R. Laldanmawia, Laldampuia, H. Lallianzama.
Subs: Lalmalsawma Hmar, Calvin Zosiamliana, Lalruattluanga, JH Lallawmkima, Lalmuansanga, Lalmuanzuala, R. Lalremruata, PC Lalawmpuia, Lalnunfela.

ZoFooty Statistics
Bethlehem VT 1-1 Chanmari West
BVT : Lalrammuanpuia 5′
CWFC : Laldampuia 8′
MOM: Vanlalzuia Hnamte, CWFC
48% Ball Possession 52%
7 Shots 9
3 On Target 7
0 Yellow Cards 1
0 Red Cards 0
Powered by Rainbow Multibrand Mobile Showroom