Marcelo Bielsa awm loh hnuah Jesse Marsch chuan Leeds United hnehna a chanpui leh ta a. Leeds United chu tun season-a Wolves laka goal thum khung thei hmasaber niin Molineux Stadium-ah 2-3 in hnehna an chang a ni.
First half-ah Leeds lam hian inhliam pathum ngawt an nei hman a. Inhliam avanga hun eng emaw chen khel thei tawh lo, hmânni lawka rawn lêt Patrick Bamford chu minute 23-naah inhliam avanga lâk chhuah a ngai a. Minute 40-naah an center-back rinrawl Diego Llorente a inhliam leh a, half-time dâwnah an midfielder rinrawl Mateusz Klich a inhliam leh a. Hetia inhliam avanga an talbuai lai hian Wolves lamin goal hnih in hma an hruai hman a ni.
Second half-ah Leeds United bawkin inhliam an nei leh a. An goalkeeper Illan Meslier chu Raul Jimenez nen an insut avangin a inhliam a, a khêl chhunzawm thei lo. Hemi avang hian Raul Jimenez chu yellow card pêk niin a hma a card a lo hmuh tawh avangin hnawhchhuah a ni a, minute 54-na aṭangin Wolves chu 10 a an khelh chhunzawm a ngai ta a.
Hei hi American coach Jesse Marsch chuan remchangah la in Leeds chuan an nawr zui a. Luke Ayling goal ban pêt per chu Wolves tlarhnung lamin an chungfel lova, Jack Harrison chuan Leeds goal khatna minute 63-naah a khung a. Hemi hnu hian Wolves tlarhnung an buai chhunzawm a, Daniel James-a’n goal kham a pet per chu Sam Greenwood chuan changin hei hi chak taka box chhunga tlân lût Rodrigo chuan Jose Sa a lâk khalh a, ding lam sir kil aṭangin Leeds United si phur sûtna goal a khung. Minute 66-naah 2-2 a ni.
Leeds hian chak tumin an nawr chhunzawm a, minute 91-naah a rah an seng ta a. Box pâwn aṭanga Jack Harrison free kick pêt chu Wolves lamin an chinfel loh ‘leh’ avangin Leeds right-back Luke Ayling chuan an chakna goal ni zui ta a khung a, mikhual Leeds United ṭantute thâwm zâwk Molineux Stadium-ah a thangkhâwk rum rum mai!
Wolves hian a ṭum khatna atan tun season Premier League-ah goal thum an chhuah ta a, chutihrual chuan heng an goal thum chhuahte hi an en lêt hunah an tlarhnung playerten an tih tur an tih ṭhat loh zia an inhmu ngêiin a rinawm a. He inkhel result hian season thara European football khelh an tumna a ti ṭhuanawp pha hial maithei a ni.
West Yorkshire club Leeds United erawh game hnih an chak zâwn ta a, hei hi an tân chuan result ṭha leh hlu tak a ni a. Tunah game 30 ah point 29 hmu in an hnuai chiaha awm, point 25 hmu mêk Everton hi anni aiin game thum laiin an khêl tlêm thung a. Leeds tâna lawmawm tak erawh relegation zone aṭanga an himna point 7 a ni ta hi a ni.
Tunhnai game 6 an khelha game 4 a tlâwm Wolves hian international break zawhah season tira an lo hneh tawh Aston Villa chu an lo mikhual dawn a. Leeds United hian league-a game 3 chak lo zâwn tawh Southampton an lo mikhual dawn bawk a ni.
Wolves 2-3 Leeds United (FT)
WOL: Jonny 26′, Trincao 45+11′
LEE: Jack Harrison 63′, Rodrigo 66′, Luke Ayling 90+1′
RED CARD: Raul Jimenez 53′
