WORK PERMIT CHUNGCHANG – Ema Ralte

Estimated read time 4 min read
‘Work Permit’ tih tawngkam hi football ngaina, a bik takin Premier League lam ngaihven te chuan kan hre lâr in a rinawm a, he ‘work permit’ avanga club in player a lakluh duh em em, mahse a lakluh theih si loh tam tak an awm a ni.

Mizoram in kan rama hnamdang mi rawn lût te tana a siam ‘Inner Line Permit’ (ILP) kan tih nen hian he ‘Work Permit’ hi a inanna lai a awm a, a bik takin England ram chhunga eizawng tura kal, footballer chauh ni lo, midang tam tak te an buai fo nachhan a ni.

WORK PERMIT HI…

• Kum 16 pêl tawh, Europe khawmualpui ram chhunga mi ni lo tan British club tana khelh dawn chuan work permit neih a ngai. Kum 16 an tlin hma a club in a lalut anih erawh chuan khawi ram ami pawh nise work permit an dil a ngai lo.

• Commonwealth ram zinga mi tan pawh work permit hi dil a ngai tho a, an thlahtute ah British mi awm mahse England ram chhunga football khela ei an zawng duh anih chuan work permit hi an dil ngei ngei a ngai. Mahse, commonwealth ram ami chu an dil dan a danglam deuh a, tin, a awlsam bawk.

• European Economic Area an tih a ram – Austria, Belgium, Bulgaria, Denmark, Finland, Estonia, France, Germany, Greece, Iceland, Ireland, Italy, Liechtenstein, Luxembourg, Netherlands, Norway, Portugal, Romania, Spain leh Sweden ami te tan work permit hi tunah chuan a ngai ve lo a. Mahse European Union atanga England hi an in hnukdawk a, Brexit hi a hlawhtling tak tak a nih chuan hei hi a danglam thei dawn a ni.

• Work permit dil tur chu an ram tan a inlan tur a ni a, chu mai ni lovin an ram chu FIFA Ranking a 70-na chin chunglam kum 2 kalta chhûngin an ni tur a ni. [Entirnan – Kumin a work permit a dil dawn anih chuan a khelhna ram chu 2013 leh 2014 ah te FIFA Ranking ah 70-na chin chunglam an nih a ngai]

• Player in Work Permit a dil anih chuan a dil ni atanga kum 2 chhungin ram tana inkhel tura an koh atanga an ram in ‘A’ level match an khelh zawng zawnga 75% ah a inlan tur a ni. ‘A’ level hi ram in competitive match a khelh zawng zawng – World Cup, EURO, CONCACAF Gold Cup, Copa America, AFCON etc. te chhiar tel vek an ni a, Friendly Match erawh chhiar tel a ni lo.

• Talent nei tha bik anga ngaih player te chu ‘Special Work Permit’ dilsak thin an ni a, hetiang hi Arsenal pawhin Japanese rawlthar Ryo Miyaichi chu an lo hmuhsak tawh a. Hei hi an khelh that vâng leh talent tha bik an nei ni a an hmuh avangte a ni tlangpui.

• Work Permit dil tur chuan Europe a football league ah season 3 tal a khelh a ngai a, season 3 chhung Europe khawmualpui a inkhel a ei an zawn tawh chuan ‘automatic’ in work permit hi hmu nghâl ang deuhthaw an ni tawh.

• A bik takin khawmualpui dang – South America leh Africa a player te zingah an thlahtute European an awm a, chumi ram hminga passport an nei anih chuan Work Permit hi dil hranpa a ngai lo. [Entirnan : Brazilian tam tak hi an thlahtu te Portugal atanga pêm te an lo awm ta a, an thlahtute ah Portuguese an awm a, Portuguese passport an nei thei anih chuan Work Permit hi a ngai kher lo]

He’ng bak criteria hrang hrang ala awm nual a, mahse he’ng te hi kan hriat atana tul zualpui deuh nia lang te an nia, sawi âwm tak hmaih pawh ka nei maithei e.

C Tlanthianghlima

Football tui ve tak

You May Also Like

More From Author

+ There are no comments

Add yours