SAFF Championship an ṭan ṭep a, chutih lai chuan a thlengtu tur India tana phurna reh rawihna tham turin mikhual Zambia chuan India chu Goa-a Nehru Stadium-ah Thawhlehni tlai khan 5-0 in an sawp!

He inkhelah hian Zambia tan Musakanya Bwalya chuan hat-trick a siam a, heng a goal thumte hi minute 21 chhunga a khung a ni.

India coach Savio Medeira chuan Steven Dias chu captain banhren a hrentir a, tlar hmaah Jeje Lalpekhlua leh Sunil Chhetri te an awm loh avangin Baljit Sahni leh Sushil Singh-te a tlan dun tir.  Zambia hian a tir aṭangin India hi an ngam nghal a, India keeper Karanjit Singh an enchhin nghal mawlh mawlh a ni ber mai. Minute 14-naah Jimmy Chisenga chuan India defender pahnih Syed Rahi Nabi leh Gouramangi Moirangthem te chu a bum a, box chhung aṭangin, awlsam zetin goal khatna a khung a. Minute thum a liam leh a, India hian chance nei vein, Steven Dias-a corner pet chu Sushil Singh chuan a head a, goal line-ah Sitali Mushumba chuan a lo clear hman tlat a, hei bak hi first half-ah chance ṭha an nei lo. Zambia hian India goalkeeper thiamzia an lantir a ni ber mai!

Second half-ah Savio Medeira chuan beisei nei takin midfielde-ah Climax Lawrence leh Francis Fernandes te chu a rawn luhtir a, tlar hmaah Joaquim Abranches a chhuah bawk a, mahse awmzia an nei lem lova, Zambia bawkin inkhel an thunun chhunzawm zel. Sitali Joseph chuan minute 55-naah goal a rawn khung a, corner an hmu mawlh mawlh a, minute 69-naah substitute Musakanya Bruce Bwalya chuan a goal khatna a khung a. Hemi hnu minute thum lekah Bwalya hian goal khung lehin minute 90-naah goal khat dang khung lehin hat-trick a rawn siam a ni. Minute 87-naah Lungu Luka chuan bar a pet per dawt bawk a, Zambia hian hei aia tam hi goal khung thei an ni a, an vanduai hle zawk a ni.

An inkhelh hma khan India coach Savio Medeira chuan Jeje leh Chhetri-te awm loh avangin India team hi an pangngai lo maithei tih a lo sawi lawk tawh a, “Jeje leh Chhetri te hi kan ram striker ṭha ber ber an ni a, an awm loh avang hian team balance a buai maithei a, mahse midangin chance an neih phah thung dawn a, an ṭhat tawkzia an lantirna hun a ni ve dawn a ni,” a lo ti tawh a. Mahse East Bengal striker Baljit Sahni te chuan Jeje leh Chhetri chu a lo la ter lo deuh ni ngei tur a ni, India tlar hma an hriam thlawt lo a ni ber mai.

Zambia hi FIFA ranking-ah 79-na an ni a, India hi an hnuai fe, 162-na kan ni ve chauh a, result awm ang lo lutuk chu a ni chuang lo ve!