<img src=”” alt=”” />
UEFA Champions League quarter Final thawhhnihna chu zanin hian khelh a ni leh dawwn a, Europe club tha zinga a tha zual thlankhawm tak tak an nih tawh avangin team chhia an awm tak tak thei tawh lova, eng inkhel pawh hi a hmuhnawm em em vek mai dawn a ni. Zanin hian France club tha Merseille leh Bundesliga cluib lian Bayern inkhel kan hmu dawn a, chu mai bakah Italy club chuai thei lo AC Milan leh Champion lai Barcelona inkhel kan hmu dawn bawk a. Zanin zanlai pelhah i tihtur tul zawng zawng kalsan la, TV hma ah thu tawp mai rawh. I inchhir lovang.

Merseille vs Bayern Munich

Time : 12:15 a.m
Venue : Stade Vélodrome, Marseille

Zanin hian 1993 a an Champion hnu a a vawikhatna atan Marseille in UCL Quarter Final an khel leh dawn a ni a, an khelmualah ngei Bayern an lo hmachhawn tur hi an phur tawh khawp ang le. He stage thleng tur hian 2010 champion Inter Milan pawh an lo tudawl tawh a, chuvangin Bayern an nih avang ngawtin an hlau bik hauh lovang.

Mahse, Merseille hi tunhnai an home ah an che tha lo em em mai a, Round of 16 va Inter Milan an tum hma thleng khan an home a vawi 18 an khelh ah vawi 9 lai an tlawm a, chutih laiin Bayern lah mikhual khelmuala huangtau chi niin away a an fehchhuah hnuhnung vawi 9 ah vawi 6 lai an chak thei si a, he statistic hi hmachhuanin Bayern an rawn phur ngei dawn a, Merseille lam hian engtinnge an lo chhan let ang? Inter ang khan an bu zawlah an lo sik vawt ang em tih hi zanin ah a chiang ang.

Merseille lamah hrem tawk Souleymane Diawara leh Steve Mandanda te an awm dawn lo a, Bayern lamah Bastian Schweinsteiger a chiang lutuk lova, midang erawh an khelh theih ngei beisei a ni. Robben, Ribery, Kroos, Gomez teho rawn attack hi Azpilicueta, Morel leh Traore teho hian dang zo tak maw?

Zofooty Prediction (Tun tuma prediction min neihsaktu hi kan Admin te zing a mi A LilFoe a ni e.)
Marseille 1-3 Bayern Munich

AC Milan vs Barcelona

Time : 12:15 a.m
Venue : Stadio Giuseppe Meazza, Milan

Zanina he Europe club lian pahnih innuai tur hi Football Lovers te chil tiput tham khawpa nghahhlelh awm a va ni tehlul em! UCL Quarter Finala match nghahhlehawm ber a ni hial awm e. Vawi 7 champion tawh Milan leh vawi 4 champion tawh Barcelona te hi tunhhnaiah an intum thei em em mai a, Group stage ah Group inang an nih avangin vawi 2 an intum tawh a, tunhma lama an lo intum tawhna ah pawh Milan hian tlem chuan an khan lo hret zel niin a lang. Kum 2005/06 season a Semi Final a an intum kha kan la hre reng ang a, kha match ah khan tuna Milan player pahnih Van Bommel leh Maxi López te kha Barcelona tan an khel a nih kha, Tunah Rossoneri kawr ha a an club hlui lo hneh ngei an tumruh hle dawn a ni (Van Bommel erawh hi chu hrem tawk a nih theihnghilh lo ila).

Milan hian zanin hian innghahna tur tha tak mai an nei a, chu chu UCL Quarter Final a an home record hi a ni. Quarter Final hi vawi 14 lo khel tawhin tun hi an vawi 15 na tur a ni a, an vawi 14 khelh tawh ah khan home ah vawikhatmah an la tlawm ngai lo a ni. He an record chhuanawm tak mai hi Barcelona, khualmual a an chhuah hnuhnung vawi 6 a hnehna chang vek leh game 4 a goal 15 thun thei hian thaichhe thei tak maw.

Zanin hian game tang tak kan hmu turah ngai ila, goal thun harsat lo tak ann nih ve ve avangin goal pawh a lut nual a rinawm hle. Milan lamah Robinho leh Ibrahimovich an khelh theih hmel a, mahse inhliam vangin Pato, Ignazio Abate, Alexander Merkel leh Thiago Silva an chan thung ang. Barcelona lam pawh inhliam Abidal, David Villa, Andreu Fontàs leh Ibrahim Afellay tellova an khelh a ngai thung ang.

Awle, zanin hian Messi goal ropui kan hmu leh dawn em? Puyol nge tha Nesta? Ibrahimovich a penalty cool kan hmu leh ang em? Barcelona passing mawi tak nge Milan counter attack ropui kan hmuh hnem zawk ang? A chhanna chu zanina h en tur a awm dawn. En la, en suh la, i thu a ni e.

ZoFooty Prediction (Tun tuma prediction min neihsaktu hi kan Admin te zing a mi A LilFoe a ni e.)
AC Milan 2-2 Barcelona