ZANINAH DSK LEH AIZAWL FC

Hero I-League kal mekah zanin dar 7 hian DSK Shivajians chuan Shree Shiv Chhatrapati Sports Complex ah Aizawl FC an mikhual dawn a, he inkhel hi TEN2 ah ‘live’ a ni ang.

Team pahnih dinhmun

Mizo player tamna DSK Shivajians hi Liverpool khawchhuak Dave Rogers a enkawl an ni a, an game hnuhnung berah Chennai City FC nen 1-1 in an inhnehtawk. Tunah hian game 12 khel tawhin point 11 an hmu a, 7-na an ni mek. Pune club hian an khingpuite lamah goal 10 thunin goal 15 an chhuah tawh thung.

DSK Shivajians hian India player lar tak tak an kawl nual bakah Mizo player thate awmna a ni a, tunhnaia India team probables puanah khan player paruk zet an thawh. Ramchhung player that e bakah hian La Liga ah te pawh lo khel tawh Spanish midfielder Juan Quero an nei a, DSK no.10 hi an player pawimawh a nih a rinawm. Hetih lai hian DSK hian an home ah hnehna chan an harsat hle a, game 5 khel tawhin vawi khat chiah an chak a, tum thum an draw bakah vawi khat an tlawm bawk.

I-League table a pahnihna Aizawl FC hian an match hnuhnung berah Mumbai FC 2-0 in hneh mahse hmahruaitu Kingfisher East Bengal point khatin an la um pha lo zel a, match khelh tur a tam tawh loh avangin an tan chuan eng match pawh hi a pawimawh em em vek tawh. Match hmasa lamah striker goal thun thei lo a ngaih Kamo Baye a che a, goal hnih a thun thei tih a lantir. Ivorian striker hian inrintawkna a neih sawt a rinawm a, hei hian Khalid Jamil a dawhtheihna rah a ni.

Game 12 khelha goal 9 chhuah tawh Aizawl FC hian tun hnai an match pathum – Kingfisher East Bengal, Chennai City FC leh Mumbai FC te an hneh tumin goal an chhuah tawh lo a, chak tluk zet a pawimawh chu ‘clean sheet’ neih hi a nih avangin Aizawl FC team boruak that lai tak a nih a rinawm.

Aizawl FC hian away a match pali an khelh tawhah point 4 an hmu a, game khat chakin vawikhat an draw a, tum hnih an tlawm thung.

Enge an sawi ?

DSK Shivajians coach Dave Rogers chuan Aizawl FC hmachhawn chu a hautak thin thu sawiin,” Eng match pawh hi a hautak dawn tih hriat sa a ni a, Aizawl khawpuia kan inkhelh pawh kha a hahthlak khawp mai. Aizawl FC hian goal an thun a, an chhuah tlem si a, hei vang hian an chak chho zel a ni. Chu chu football a thil pawimawh ber a ni lawi si,” tiin an khingpui turte chuan khelmual chhung leh pawnah thlawptu an nei tha thin hle a a hriat thu a sawi bawk.

DSK hian a zawnin away ah match pali zet an neih hnuah an home ah an khel leh dawn a ni a, hemi chungchangah Rogers hi a lungawi zan lo tih a tawngkam atangin a hriat theih bawk.

Aizawl FC coach Khalid Jamil a tawng tam lo lehpek hle a,” Beiseina sang tak nen team tha tak hmachhawn turin kan lokal a. Ka naute hian hlim takin, tha tak leh nuam tit akin khel se ka duh ber,” tiin a sawi.

Team pahnihte inhmachhawn hmasak tum khan Aizawl FC hian miute 89-naa substitute Brandon VL Remdika goal hmangin hnehna an chang a, captain Alfred Jaryan chu Hero of the Match atan thlan a ni.