ZANINAH I-LEAGUE A HMUHNAWM DAWN

Estimated read time 3 min read

Hero I-League khelh mekah vawiin tlai dar 4:30 hian hmahruaitu Aizawl FC chuan Ludhiana khawpuia Guru Nanak Stadium – ah Punjab Minerva FC an tlawh dawn a, he inkhel hi TV ah pekchhuah a ni dawn lo a, ileague.org ah ‘livestream’ a ni ang.

Inkhel dangah tlai dar 4:30 ah vek DSK Shivajians in Maharashtra derby ah Mumbai FC an mikhual ang a, zan dar 7:05 ah Bengaluru FC leh Mohun Bagan an innuai bawk ang.

MATCH NGA CHAUH !

All India Football Federation in Indian football kalphung thlak a tum avangin tun Hero I-League hi I-League hnuhnung ber tur a nih tawh a rinawm a, hei vang hian kumdang zawng aiin team tinte’n champion an tum a tih theih. Tun dinhmunah Aizawl FC hian match 13 khel tawhin point 29 an hmu a, anmahni hnaih bertu Kingfisher East Bengal aiin point hnihin an sang.

Punjab Minerva an hmachhawn tur tiamin The People’s Club hian match nga (5) chauh khel tur an nei tawh a, an dinhmun hi an hum thei ang em tih hriat a chakawm tawh hle.  Aizawl FC hian tunhnai match ruk chhungin hneh loh an nei tawh lo a, match li zet goal chhuah lo in an kaltluang tawh bawk.

Khalid Jamil chuan DSK Shivajians an hneh tum a bultante a thlak loh tur thu a sawi a, chutih rualin astroturf a match ruk zet an khelh hnua natural grass a khelh chu insiamrem an mamawh tur thu a sawi tel bawk.

I-League table ah pariatna ni mek Punjab Minerva hian game 13 khelin point 11 an hmu tawh a, an match hnuhnung berah an mualah hian DSK Shivajians nen 0-0 in an inhnehtawk. India rawlthar tha engemawzat lo enkawl tawh Surinder Singh a enkawl Punjab club ah hian Indian Super League leh Pune FC a hming chher tawh Lalrempuia Fanai bakah Aizawl FC striker hlui Joel Sunday te an awm a, anni pahnih bakah hian Shillong Lajong midfielder hlui David Ngaihte te, I-League a goal thun thei naupang ber Baringdao Bodo leh India rawlthar tha dangte an kawl bawk.

Minerva Punjab hian tun hnai an match hnuhnung pali ah chak loh an nei lo a, Surinder Singh hian Aizawl FC lakah a naute chakpui a tum hle bawk.

Team pahnihte Aizawla an inhmachhawn tum khan hun tawp dawn a Minerva Punjab defender Loveday-a own goal hmangin Aizawl FC in point thum an hlawh chhuak a, zanin hian result danglam thei tak ang maw ?

He inkhel en tur hian Ludhiana atanga km 270 vel zet a hla Dehradun atangin Mizo thalai rual an kal a, khawi hmunah pawh Mizo nih a nuam thin e !

 

 

C Tlanthianghlima

Football tui ve tak

You May Also Like

More From Author

3Comments

Add yours

+ Leave a Comment