Zaninah Indian Super League final

Zanin dar 8:00 hian Bangalore khawpuia Sree Kanteerava Stadium-ah Indian Super League final khelh a ni dawn a, Bengaluru FC leh Chennaiyin FC te’n champion nih an inchuh dawn.

An sulhnu

Bengaluru FC in tun season atangin Indian Super League an khel dawn tih a chian khan Indian football ziakmi pakhat chuan,” Hei hi ISL club dang tan chuan chanchin lawmawm loh a ni. Bengaluru hi club ngialnghet sa an ni a, an champion ngei ang le,” tiin a sawi a, a thusawi ti dik turin vawi khat chak chiah an mamawh tawh.

Albert Roca naute hian league match vawi 18-ah vawi 13 chakin vawi 4 an tlawm a, tum khat an inhnehtawk. Vawi 4 an chak loh zingah hian final an khelhna tur Sree Kanteerava Stadium-a Chennaiyin an hneh loh a tel. League-ah hmahruaitu niin semi-final ah Pune City an hneh zui a, harsatna nei loin final an lut.

English coach John Gregory enkawl Chennaiyin hian league match vawi 18 khelhah vawi 13 tho hnehna an chang a, vawi 4 tlawmin tum nga (5) inhnehtawk an nei. Anni pawh hi zanina an khingpui tur Bengaluru laka tlawm tawh an ni a, khualmuala an hneh kha an khelmualah an hneh thei lo. League-ah pahnihna an nih hnuin semi-final inkhel pahnih belhkhawmah FC Goa 4-1 in an hneh.

Jeje vs Chhetri

Zanin final khelh tur bika mipui mit la ber tur a ngaih chu Mizo tlangval Jeje Lalpekhlua leh Delhi tlangval Sunil Chhetri te hi an nih a rinawm. Kum 33 a upa Chhetri hian game 20-ah goal 13 a thun a, semi-final ah pawh hattrick a la siam zak zak thei. Bengaluru hian star player dang engemawzat kawl mahse a tawp tak takah chuan India captain hi an innghahna a ni thin a, hun pawimawiah Chhetri hian a chhan him fo.

Kum 2015 champion Chennaiyin tan Jeje Lalpekhlua’n semi-final a Goa an hneh theih nan goal hnih a thun a, game 19-ah goal 9 thun tawhin Chennaiyin player zinga goal thun hnem ber a ni mek.

Player pahnihte hian an team te champion pui an tum mai bakah ram tan kum 33 a upa Chhetri thlak turin kum 27 a upa Jeje hi a record enin a tha tawk a, Chhetri chawlh huna Indian football-a hming langsar ber ni mai tur Mizo tlangval tan zanin hi inkhel pawimawh bik a ni.

Player dang

Anni pahnih bakah hian Bengaluru tana Venezuala tana vawi 50 chuang inlan tawh Miku pawimawhna sawi hmaih chi a ni lo a, game 19-ah vawi 14 a pet goal. An goal-a ding tur Gurpreet Singh Sandhu hi a rintlak a, tlarhnunga ding thin Juanan, Rahul Bheke, Subashish Bose leh John Johnson te hi paltlang chakawm an ni lo. Bengaluru hian an duh chuan midfield-a chhawr tur foreigner pali an kawl a, an winger tlanchak Udanta Singh hi hmuh loh theih lohin a inlar bawk ang.

Chennaiyin hian goal-a ding turin India keeper hlui Karanjit Singh an nei a, an captain Henrique Sereno te, Spanish defender Inigo Calderon, Brazilian defender Mailson leh Hero of the Match bakah Emerging Player of the match atana vawi 7 zet thlan tawh Mizo tlangval Jerry Lalrinzuala te hi tlarhnunga ding tur an ni dawn a, an chhe thei lo.

ISL thuneitute’n final khelh nan Bengaluru khelmual an thlang a, ‘The Fortress’ a chak loh hi Bengaluru fans tan a na dawn a, khelmual neitu ngei hneh a nomawi chawi hi Chennaiyin tan a lawmawm zual ang.

Posted in AIFF, India, Ramchhung.

Leave a Reply

Or