Football Tuipuitu tam takten an ngaihhlut leh dahsan em em, thenkhat phei chuan World Cup ai pawha class sang zawk hiala an chhal UEFA Champions League Quarter Final thawhkhatna chu zanin / naktuk zing hian khelh a ni leh dawn ta a. A hmasa berah APOEL FC vs Real Madrid leh Benfica vs Chelsea te en tur a awm dawn a. Inkhel hmuhnawm tak kan hmu ngei dawnin a lang.

APOEL FC vs Real Madrid CF

Time : 1:15 a.m
Venue : GSP Stadium, Nicosia

He fixture hi en mai chuan Real Madrid hi awlsam taka chak thei mai tura rin an ni a. Amaherawh chu Cyprus club zinga UCL Knock out stage inpet kai hmasa ber hian chuti maia tlawm ngawt an tum hauh lovang le. An kalkawngah Europe a tea tha ve tak tak Lyon, Porto, Zenit St Petersburgh te pawh lo tudawl tawh an nih avang in an khelmual hmanthiamah hian an tawh a khirh khawp ang.

APOEL hi tun season UCL bikah hian an home a vawi 7 an khelh ah vawi 5 chakna an chang thei a, an home record a tha hle a ni. Amaherawh chu Spain club hrim hrim hi an chai thei lo ve reng reng a, Spain club vawi 10 an tum tawh ah vawi 5 draw in vawi 5 an chak loh bawk a, tin, tun seasonah Real Madrid away form a ropui em em mai a, mi khelmuala vawi 8 an kalah vawi 7 lai hnehna an chang thei a, hei vang hian tlemin mi tamzawk ngaihah chuan Real buk a rit zawk ngei ang.

APOEL lamah hian Gustavo Manduca chu hrem tawh avangin a khel thei dawn lova, an goalkeeper tha Panos Constantinou pawh inhliam vangin an chan dawn bawk a. Real lam pawh hrem tawk Xabi Alonso leh inhliam Lassana Diarra, José Callejón, Ricardo Carvalho leh Ángel Di María te tellova an khelh angai bawk ang.

Football is a beutiful game an tih angin thleng thei lo a awm lova, Statistics leh Player enin Real Madrid hi chungnung zawk mah se inlehthalna ropui a thleng ang nge thleng lovang ilo thlir phawt mai ang u.

ZoFooty Prediction : APOEL FC 1-3 Real Madrid

SL Benfica vs Chelsea FC
Time : 1:15 a.m
Venue : Estádio do Sport Lisboa e Benfica, Lisbon

English club la dam awmchhun leh Portuguese club la dam awmchhunte inkhel tur hi Football tuipui mi tan chuan nghahhlelh loh rual a ni lo. Benfica hian Europe a an Home record ropui tak hmachhuanin Chelsea hi an lo hmachhawn ngei ang a, engtintak The Blues hian chhanglet ang maw? December 2010 atang khan Benfica hian an home ah hnehtu la tawng lovin vawi 4 an chak a, vawi 2 an draw thung. Chutih laiin Chelsea ve thung hian tun season ah khualmualah vawi 2 draw leh vawi 2 chak loh an nei tawh a. Zanin ah hian an chak hmasak ber tawng tak maw?

Benfica hi inhliam Defender Ezequiel Garay leh forward Yannick Djaló tellova an khelh leh ngei a ngai dawn a, chutih laiin Chelsea defender Ivanovic tih loh chu khel thei vek tura ngaih an ni. Tin, Benfica player hlui David Luiz leh Ramirez te hian an team hlui hneh hi an chak ngei a rinawm a, game hmuhnawm tak kan en a rinawm hle a ni.

Chelsea boss Matteo chuan, “Tunah hian ka team te ka ring tawk a, mi tam tak leh Frank Lampart te pawhin tunhma kan pha tawh lo angin sawi mah se kan tha tawk a, zaninah pawh hian hnehna chu kan chang ngei ang.” a ti. Enge i hmuh ve dan le?

ZoFooty Prediction : SL Benfica 2-1 Chelsea FC