Manchester United-a khelhna hmun chang tawh meuh lo Dimitar Berbatov chuan Russian club Zenit St Petersburg a zawm hnai hle niin Daily Star chuan a ziak.

Berbatov hian hmanni mai khan United-a a contract chu kumkhatin a pawtsei a, Old Trafford-ah hian a la cham chhunzawm dawn niin a lang hman. Mahse he Bulgarian striker hi Sir Alex-a’n a chhawr duh tawh meuh lo a, a contract an pawhsei sak pawh hi manto zawka hralh an duh vang niin Daily Star chuan a tarlang a ni.

Kum 31 a upa Berbatov hian beisei aiin lei duhtu a ngah lo a, a lei duhtute pawhin a man (pound maktaduai 10 vel) avangin khawdang an hawisan fo. Juventus leh AC Milan te nen sawizawm a ni hman thuak thuak a, Turkish club Galatasaray hming a lang nawlh bawk. Tunhnaiah QPR lama kal turin ri ret ret a awm hman a, mahse QPR manager Mark Hughes chuan Berbatov lakluh an tum loh thu a puang tawh a ni.

Italian chanchinbu La Gazetta Dello Sport in a tarlan danin a man chungchangah Zenit leh United aiawhte thui tak an inbe tawh a, Berbatov-a agent nen pawh inremna thui tak an neih tawh a ni.

2010/11 season ah Manchester United top scorer a ni a, Premier League top scorer (Tevez nen) a ni bawk. 2011/12 season a lo inherchhuak a, Sir Alex-a striker duh ber palina a ni ta daih a. Game pawimawh leh langsarah a start ngai tawh lo tluk a ni a, nipui bazar inhawn chhung hi chuan a chhuah ngei a rinawm a, United in a man an chhiar zata lei ngamtu an awm angem tih erawh zawhna lian tak a ni.

source: dailystar.co.uk