Manchester United coach Jose Mourinho chuan tun hnaia goal khung harsat Zlatan Ibrahimovic a chhan a, Swede forward rilru puthmang chu a fak thung.
Portuguese manager Mourinho hian a player-te chu Europa League-a Fenerbahce an hneh loh tumin sawisel a, amaherawhchu match hnuhnung 11-a goal khat chiah khungtu Zlatan chungah erawh rinna a la nghat. United boss chuan, “Premier League match zawng zawng, goal a khung lo tumin pawhin a entawn tlak a, a rilru put hmang a chhuanawm thei hle a ni,” tiin kum 35-a upa striker chungchang a sawi.
United hian match hnuhnung pasarihah vawi hnih chiah an chak a, Premier League match hnuhnung pali atangin point thum chiah an hlawh chhuak bawk.
Portuguese manager hian United hi match 17 atangin vawi kua chak pui a, Dutch manager Louis Van Gaal-a season khatna nen an record a inang chiah. Sir Alex Ferguson thlaktu David Moyes aiin match khatin a chak tlem a, Van Gaal-a season hnihna aiin match khat thoin a chak tlem bawk.
Mourinho hian May thla khan kum thum chhung atan United-ah contract a ziak a, tunah hian harsatna tam tak a hmachhawn mek. A squad inrual khai lo chu a harsatna pakhat a ni a, defence laia ding Chris Smalling leh Eric Bailly te inhliamin harsatna a belhchhah bawk.
November 6, Pathianni zan dar 8:30 khian Manchester United hian Liberty Stadium-ah Swansea City an tlawh ang.
+ There are no comments
Add yours