Mizo football website hmasa ber ZoFooty.com chuan vawiin hian kum 10 a tling ta.
ZoFooty.com hi ‘Football tuimite Khelmual’ tih a ni deuh kher a, internet hmanga football khelhna hmunpui a ni. Kum 2011 February thla khan zofooty.blogspot.com tiin siam a ni a, post hmasa ber hi February ni 8, 2011 (vawiin ang) khan siam a ni. Hemi hnu rei vak lovah domain lei a ni a, website design thar te siam a ni chho zel a. Official taka website thar hi hawn a tha kan tih tlan avangin July ni 9, 2012 khan S. Malsawmtluanga (Mama) chuan min hawn sak a ni.
Mizoramin ‘instagram’ kan la hmelhriat hma niin facebook leh website lamah kan lun ve thin hle a, Youtube lama kan channel ‘ZoFooty Mizo’ pawhin ngaihhlut a hlawh ve thin hle. Kawng khat tala Mizoram football chawisanna a nih beiseiin ‘ZoFooty Awards’ chu kum 2012, 2013, 2014 leh 2015 te khan kan sem thei a ni. Tin, Mizoram Football Association nen tha taka thawk dunin MPL awm tirh atangin ZoFooty.com hian statistics kan la buatsaih thei zel a, a hranpain ‘statistician’ kan nei bawk a ni.
Tluang taka kan kal laiin kan ‘facebook page’ hi vanduaithlak takin tum hnih ngawt a chhia a, tunhnaiah phei chuan eizawnna leh mahni tul avangin kan ‘active’ ta lo hle a, heti chung chung hian ZoFooties te zarah kan la kal vek bek bek a ni. Tun season hian kum danga kan lo tih thin angin Fantasy Premier League kalpui leh a ni a, Zonet JB sponsor he league hi mi 2,332 zetin an khel a, season tawpah lawmman sem a ni ang.
ZoFooty hian website, facebook page leh instagram account bakah ZoFooty android app kan nei a, min lo tlawhsak thin turin kan sawm che u a ni.
