Europe khawmualpui football club te inelna sang ber Champions League match day 1 khelh zawh a ni ta a, football mawina leh football chhung a thilthleng thei te kan hmu kim nghal hle. Game 16 khelhah goal 44 kan hmu nghal a, club inthlau tak insawp kan hmuh rualin, inlehthalna ropui kan hmu bawk, football fans tan a hlimawm in a hmuhnawm a, heihi football ropuina a ni!
1. RONALDO CHU RONALDO, MAN UTD PAWH MAN UTD! : Tun nipui football bazar a thawmna ber tih theih chu Man Utd-ah Ronaldo kirleh a ni a, beisei ang ngei in a che tha zawm a, Man Utd tan game 2 a khelh ah goal 3 a thun der tawh. Ronaldo goal thun dan striker tha bik leh fing a nihna a lantir rualin a siam tu Bruno Fernandez-a diagonal pass class tak mai kha hmuh hmaih theih a nilo ang. Wan-Bissaka’n tul lo taka red card a hmuh hunah Solskjear-a’n goal khung belh tum aiin inven a thlang a, goal nawr chhun zawm loh rah an tuar. Switzerland champion Young Boys te an khelmual hman thiam a khel an ni bawk a, a tawp thleng a an tanrualna rah sengin 2-I in Man Utd an lehthal. Man Utd chak loh chhanah Lingard pass sual langsar mahse thutlukna siam tu Ole Solskjear tihsual a tih thei awm e.
2. BARCELONA AN RAL TA EM NI?: Camp Nou-ah European club lian pahnih an in nuai a Barcelona in German club ropui Bayern Munich an mikhual, mikhual team kawng engkimah an chungnung zawk a, Muller, Lewandowski goal 2 hmangin 3-0 in an chak. Barcelona hian minute 90 chhung in goal zawnah vawi khat mah shot an nei theilo a, ball an chang tlem zawk bawk. Ronald Keoman a team te hian tiki taka a khel tawh lo a, Bayern Munich game dan chah a counter attack an tum! Tun dinhmunah Barcelona tan UCL Champion sawi a harsa a, chutih rualin Bayern Munich tan pawh fiahna tak tak an la tawng lo ang pawhin a ngaih theih hial!
3. HAALAND LEH DORTMUND AN HMUHNAWM: Istanbul-ah Borussia Dortmund an leng lut a,Turkish club tha Besiktas an tum a, mikhual tan a khelh har an tihna khelmualah Dortmund 2-1 in an chak. Man of the match ni thei English rawlthar Jude Bellingham a chetha a, ropui takin a volley goal bakah, box chhungah ball khalh lutin Haaland pet goal tur a siam sak. Haaland ropuina sawi hmaih theih a nilo, he rawlthar kum 21 mi hian UCL-ah goal 17 a khung ta der mai. Kum 21 nih lai rau rauah tuna khawvel a thiam ber kan tih pahnih te aiin a ropui, Messi hian UCL goal 6 a khung a, Ronaldo phei chuan UCL goal a la nei lo!
4. MESSI, MBAPPE LEH NEYMAR DANG THEI CLUB BRUGGE : Belgium champion Club Brugge in PSG an mikhual a, khawvel in hmuh a beisei Messi, Mbappe leh Neymar te khel ho kan hmuh vawi khatna a ni a, goal a tam pawh a rinawm! Chutiang beiseina chu Club Brugge lamin min hmuhtir duh biklo, PSG tan a goal khung tu chu Man Utd atanga chhuak Ander Herrera a nita thung a, Club Brugge tan Vaneken chuan a sut ve bawk. An groupah Man City leh RB Leipzing te an awm ve bawk avangin PSG tan point hnih uiawm tak an chan a tih theih awm e.
5. GOAL RUK KHUNG MAHSE PEP GUARDIOLA A HLIM LO!: Man City in RB Leipzig an mikhual a, 6-3 in an lo sawp Man City tan player hrang thiau Aké, Mukiele (OG), Mahrez ,Grealish ,João Cancelo, Jesus ten a khung a team game khel thei leh club tha an nih an lantir, mikhual tan Nkuku chuan hattrick siam mahse chakpui nan a tawk lo, Pep hian a nau te inkhel dan ah a lawm, chutih rualin fans lakah a lawm lo! UCL match en tu mipui an tlem a ti a, weekend ah Southampton an khel tur atan fans a sawm khawm hial!
6. KUM 2005 CHHUNZAWMNA LIVERPOOL LEH AC MILAN: Liverpool leh AC Milan inkhel sawi hi chuan kum 2005 Istanbul a ri nghal zel, chutiang deuh thil thleng leh in football mawina, tahna leh hlimna keng tel inkhel kan hmu. Liverpool in bul an tan tha a, Minute lekah hma an hruai nghal a, Minute 14’ naah Salah penalty pet goal loh hnuah khel chhe zawk a ngaih AC Milan lam in half time hma minute 42’, 44’ ah inhnaih te in goal hnih an khung a, 1st half a zawh meuh chuan AC Milan in hman an hruai der! Liverpool an beidawng lo a, 2nd half tan tirhah Salah goal hmangin an chhang let a, minute 69naah Liverpool captain Jordan Henderson chuan 20 yards atangin a volley goal hmangin an chak zui. Liverpool manager Jurgen Klopp chuan an player tha a awl tir nual a, a chetsual pui teuh hle rualin a chakpui theih tak tho avangin fak leh huaisen nih a hlawh thei leh ta thung!
