India leh Sri Lanka in draw!

#ZoFooty

SAFF Championship khelh mekah India chuan vawiin tlai dar 4.30 khan an match hnihna khelin Sri Lanka nen goal awm lovin an inhnehtawk a, point khat ve ve an insem.

Tihian, India in match 2 ah point 2 hmuin Sri Lanka erawhin match 3 ah point 1 an hmu thung. India hian October ni 10 hian Nepal an hmachhawn leh ang.

Tute nge India tan khel?
National Football Stadium, Male, Maldives-a inkhelah hian India-in match hmasa lama Bangladesh an draw țuma an starting XI pathum thlakin centre back mumal nei lovin an khel.

Centre Back Chinglensana Singh aiah Left back Mandar Rao chuan inkhel bul țanin match hmasa lama left back Subhasish Bose erawh alaiah dah a ni thung a, amah dinpui tur hian match hmasa lama Centre Back khelțha lem lo tak, Rahul Bheke bawk dah leh a ni a, Rahul Bheke position pangngai hi right back a ni. Right Back erawh Pritam Kotal aia lut Seriton Fernandes a ni thung.

Defensive midfielder pahnih dah niin Glan Martins bulah Manvir Singh aia lut Suresh Singh a awm a, anhmaah Anirudh Thapa a awm thung. A sirah Liston Colaco leh Udanta Singh tho awm lehin Captain Chhetri chu hmatawngah a awm.

Squad-a Mizo awmchhun Lalengmawia (Apuia) erawh a inlan lo a ni.

Beisei pha lo India!
India in first half-ah game thunun mah se goal chance an insiamthei lova, chance an nei meuh lo. Table mawngphaha awm Sri Lanka defence țhiat thei tur player an nei meuh lova, Jeje Lalpekhlua inhliam hnuah Sunil Chhetri kawppui tur India in a la nei lo tluang zel a ni.

Midfielder ball sem thei leh ‘creative’ India in a nei lova, hei mai bakah centre back mumal a nei lo bawk. Sandesh Jhingan a inhliam a, Chinglensana Singh lahin beisei a pha lo, India an talbuai zel a ni.

Second half-ah Yasir Mohammad, Farukh Choudhary leh Manvir Singh lutin danglamna an thlen thei lova, mahse India in an nawr chhunzawm thung. Half chance an in siam zeuh zeuh a mahse chance hlauhawm tak erawh an insiam thei lo. Hun tawp dawna Sunil Chhetri-a head pial left footer Subhasish Bose-a’n a ke dinglama a dawng fuh lo kha an ui viauin a rinawm. A ke hman thiam lam chu nise a tlawh goal mahna!

India khel hi a hmuhnawm loh a ni mai lova, goal thun an harsat em em bawk.

India hmabak a ko
SAFF Championship ah hian ram panga – India, Bangladesh, Maldives, Nepal leh Sri Lanka te an inel a, vawikhat țheuh an in hmachhawn ang a, a sang pahnihin October ni 16 ah final an khel ang.

Tunah hian Nepal in match 2 ah point 6 hmuin hma an hruai mek a, Bangladesh-in match 2 ah point 4 hmuin an dawt a, India in match 2 ah point 2 hmuin pathumna dinhmun an luah. Sri Lanka-in match 3 ah point 1 hmuin champion lai leh a thlengtu Maldives-in match 1 chiah an la khel a, point an la hmu lo thung.

Indian hian table hmahruaitu Nepal leh champion tura rinkai Maldives an la hmachhawn dawn a, hmabak a hautak ang. SAFF Championship hnuhnung ber, 2018-ah khan Maldives in final ah India hnehin a vawihnihna atan an champion a ni.

Tu mawhphurhna nge?
Indian Super League (ISL) awm hnuah player te hlawh a sangin hamțhatna pawh an ngah sawt hle. Club tinten champion duhin foreign player țha an lalut a, game pawh a hmuhnawm phah a ni. Nimahsela National Team ah erawh India khelin beisei a pha lova, hma a sawn lova, result țha a awm thei lova, ISL in rah țha a chhuah lova ngai an tam ta hle.

ISL hi lang ropui viau mah se Indian player țha an chhuak tam tawk lova, club kalphung a dik lova, chak duh luat vangin player in chher aiin a țha sa lak an duh tiin sawisel pawl an awm a ni.

Chutih rualin mi tam takin India Coach, Croatian Coach Igor Štimac an dem a, an duh loh thu an au chhuahpui. Match 18 ah vawi 3 chauh a la chakpui a, vawi 7 chak lovin vawi 8 lai an tumpuite an draw a ni. Coach hi thlak se India in hma a sawn ring an awm a ni.

Player 10-a khel Bangladesh draw tu leh Sri Lanka la hnehtawktu India Team ah hian Mizo khel an tlem tial tial bawk a, tunah phei chuan Apuia chiah squad-ah a awm a, a start khat em em bawk.

Blue Tigers fixtures
Oct 10: Nepal vs India
Oct 13: India vs Maldives