Thlasik bazar chu a tawplam kan lo hnaih leh ta der mai a. Transfer lian tham tia sawi tur la awm lemlo mahse player tha leh beiseiawm tak tak te lut leh chhuak chu kan hmu nual a. Player te inlei aiin hawhchhuak hriattur thawm a tam zawk niin a hriat. Thlasik bazar a che ngai meuhlo Arsenal pawhin kum dang angin an che dawnlo emaw tih laiin naupang bawk an lei leh dawn niin a lang. Naupang lalut mahse naupang thenkhat an hawhchhuak tir zel bawk.

Player lut? Nipui chhung zawng khan Borussia Dortmund leh Germany midfielder Mario Gotze chu Arsenal nen hian sawizawm a ni a. German champion te hian an chelhbet thei hram ta niin a lang. Thlasik ah hian Gotze hi chelh thei mahse an midfielder beiseiawm kum 19 mi Thomas Eisfeld chu an chelh thei dawn ta lo niin a lang. Tunah Borussia Dortmund Youth team a top scorer ni mek Thomas Eisfeld hi a agent Reza Fazeli nen London ah Arsenal hotute nen an inbe tawh tih Daily Mail chanchinbu chuan a sawi a. Thomas hian medical test a paltlang chuan Arsenal hian Dortmund hi a contract tawp mai tur zangnadawmna angin pound 420,000 vel a pe dawn niin sawi a ni.

Player chhuak te Contract tawplam hun hmang mek Robin van Persie, Theo Walcott leh Tomas Rosicky te hi mi tam zawkin an contract an pawh sei an ring a. Andrey Arshavin hi chu a dawrtu a zirin hralh an hniallo tih chu a lang. Manuel Almunia leh Sebastian Squillaci te pawh hi a lei duhtu a zirin hralh an hniallo tih a lang bawk. Tunhnaiah rawlthar beiseiawm te club dangin an hawhchhuak a. Chung te chu Chuks Aneke(Stevenage) Emmanuel Frimpong(Wolves) Rhys Murphy(Preston North End) Sanchez Watt (Crawley Town) Daniel Boateng (Swindon) Sead Hajrovic(Barnet) an ni. Heng zinga ngaihven hlawh ber chu season hmasa lama Feyenoord a hlawhtling taka hun hmang Japanese winger Ryo Miyaichi hi a ni. Inhliam dam kawr Miyaichi hi Bolton in hawh an dil nia sawi a awm a. Ball a thiam leh a tlan chak (Walcoot nena khaikhin thin a ni) avanga ‘Ryodinho’ tia hming pek hi British sawrkar pawhin a beiseiawm avanga work permit an pek kha a ni. Owen Coyle hnuaiah hian Jack Wilshere hnungzuia hlawhtling taka hun a hman a rinawm.