Transfer window a tawp dawn tawh a, club hrang hrang ten player an inleibelh zel.

Arsenal ah South Korea captain

English club lian Arsenal chuan AS Monaco aṭangin South Korean striker Cho Young Park an lei fel ta. Park hian Arsenal ah jersey no. 9 a ha dawn a ni.

Kum 26 a upa, South Korea captain manah hian Arsenal in £2.5million an pe phawt ang a, a khelh ṭhat dan azirin hei hi a la pungchho thei ang. Tunlai player manto dan ngaihtuahin international player, striker lehnghal £2.5 million in a lei thei a, Arsene Wenger hian transfer ah a thiam a la theihnghilh lo e.

Park hian Monaco tan Ligue 1 ah game 91 khelin goal 25 a thun a, South Korea tan game 53 ah goal 17 a thun tawh bawk. Asia Young Footballer of the Year te pawh a lo ni zak zak tawh a ni. Arsenal a luh chu ‘dream move’ tiin a sawifiah a, “He club ah hian ka thiamna pholang turin ka lo lut a, ka beidawng dawn lo a, field ah hian engnge ka tih theih hi ka lantir dawn a ni. Arsenal player ka ni hi ka lawm em em a, fans te pawhin min ṭanpui ka beisei a ni” a ti.

Sum ngah PSG ah Uruguay captain

Uruguay captain Diego Lugano chuan Fenerbahce chhuahsanin team indinthar mek Paris St Germain ah a lut. A clb tharah hian Pastore, Kevin Gameiro leh Jermery Menez te a zawm dawn a ni. A man zat chiah hi puanzar a ni rih lo.

Kum 30 a upa, Fenerbahce leh Uruguay tlarhnung bang rinawm Lugano hian a club chu Turkish League ah vawi hnih a champion pui a, Copa America 2011 ah Uruguay chu a champion pui nghe nghe a nih kha. Thawhlehni chawhnu lamah press mite hmaah pholan a ni ang.

Arsenal defender Traore a chhuak

Premier League kaithar Queens Park Rangers pawhin player an leibelh ve zel a, Arsenal aṭangin left back Armand Traore an lei. QPR ah hian Luke Young leh Joey Barton te a zawm  ang.

Traore hian kum 3 chhung atan contract a ziak a, “Neil Warnock (Manager) nen kan inbia a, kâr tin ka khelh theih tur thu min hrilh a, hei hi tuna ka mamawh ber a ni. Club lian tak tak, Arsenal leh Juventus ah te ka awm a, ka thiamna hi ka duh ang takin ka la lantir thei lo a ni.” a ti.

Kum 21 a upa Traore hian season hmasa khan Juventus ah loan in a khel a, Arsenal tan tunhnai thla 15 chhungin Premier League ah vawi khat chiah a la khel a ni.

Newcastle ah Inter Milan left back

Italian left back Davide Santon man chungchangah Inter Milan leh Newcastle United an inrem tawh a, Newcastle hian £5.6 million an pe ang.

AS Roma pawhin lei an tum Santon hi kum 20 a upa a ni a, Jose Mourinho awmlaiin Inter Milan ah first XI a chang pha ve ngat ṭhin a, Champions League 2009 a Manchester United leh Inter Milan an intum a Cristiano Ronaldo check tu kha a ni. A khelh ṭhat theih em avangin Paolo Maldini nen khaikhin hial a ni ṭhin a, mahse Mourinho chhuah hnuah a khel tam tawh lo a, a form a chhe zui. Inter in Japanese full back Yuto Nagatomo an lei tawh bawk nen, Premier League lama chhuah hi a thlang ta a ni.

Newcastle United ah hian Jose Enrique hmunruak a hnawhkhat ang.