Thawhlehni zan khan Champions League Group stage an khel leh tan ta a. English club pahnih – Arsenal leh Manchester City te result kan tarlang tawh a, club dang lanna telin i lo thlir ve zuai zuai teh ang.

Sum hmang hnem Paris St Germain chuan 4-1 in Dynamo Kiev an hneh a. An player lei thar, goal khung tura piang ve reng emaw tih mai tur Zlatan Ibrahimovic a tangkai hle. Borussia Dortmund, Porto, Malaga leh Schalke te an chak bawk.

GROUP A:

PSG chuan 4-1 a in Dynamo Kiev an hneh a. Ibrahimovic chuan penalty hmanga goal khungin, Champions League-ah PSG bakah Ajax, Juventus, Inter Milan, Barcelona leh AC Milan tan goal a khung tawh a. Champions League-ah club hrang hrang paruk tana goal khung thei hmasa ber a ni.

PSG tan hian Ibrahiovic bakah Thiago Silva, Alex leh Javier Pastore te chuan goal an khung a. Ukrainian club Dynamo Kiev tan Miguel Veloso chuan goal khat a khung belh ve a ni.

Portuguese club Porto an pawr hle a. 2-0 in Croatia club Dinamo Zagreb an hneh a, Lucho Gonzalez leh Steven Dafour ten goal an khung.

GROUP B

Arsenal chuan French club Montpellier chu 2-1 in an hneh a, German club Schalke pawhin Greek club Olympiakos 2-1 bawkin an hneh.

Arsenal chuan a zawna season 15 Champions League an khelhna opening match-ah 2-1 in hnehna an chang a. Si phur hmasa mahse hnehna an chang a, RVP awm loh a lang lo e.

French champions Montpellier tan Younes Belhanda chuan penalty atangin, minute 9 na lekah goal hmahruai a khung a. Mahse Arsenal hian Lukas Podolski leh Gervinho te hmangin, minute 3 chhungin first half-ah goal hnih an khung a, second half-ah goal dang a awm lo.

Montpellier atanga Arsenal pantu Olivier Giroud a che tha lova, Arsenal hian second half-ah an khel chhia. Mahse an goal an humhim a. Liverpool an hneh tuma an khelh dan angin, counter-attack fing tak an hmang a, an khel a hmuhnawm lem loh.

Schalke tan Benedikt Howedes chuan goal a khung a, Zagreb tan Djamel Addoun chuan a sut leh hnuah Klaas-Jan Huntelaar chuan goal a rawn khung leh vat a ni.

GROUP C

Spanish club hausa thar Malaga chuan Champions League an khelh vawikhatnaah Russian club Zenit St Petersburg 3-0 in an sawp a. Zenit tan hian an striker lei thar Hulk chuan a khel nghal na a, Europa angin a che ropui thei tlat lo.

Malaga tan Isco Alarcon chuan goal hnih a khung a, Javier Saviola chuan goal khat a khung bawk.

Inkhel dangah AC Milan chuan Belgian club Anderlecht an mikhual a, goal khung lovin an tawp a, San Siro-a inkhel an nih avangin Milan an hlim lo hle.

GROUP D

A season hnih nana Champions League khel Manchester City chu Madrid khawpuiah Real Madrid-in 3-2 in an lo hneh a. Cristiano Ronaldo an ngam lo.

Inkhelh tan tirh atangin City hian Real hi an ngam lo nghal a, hun tawp thlengin an ngam lo a ni ber mai a. Real-in goal khung an tum a, City an inveng a ni ber a. Joe Hart-a’n a dang zing hle. Amaherawhchu Edin Dzeko chuan goal a rawn khung hmasa tlat a, City-in Real lakah, away-ah lehnghal goal an khung hmasa.

Marcelo chuan an si phurh a rawn sut a, mahse rei lo teah Aleksandar Kolarov chuan free-kick atangin goal a rawn khung leh a, City-in hma an hruai leh. Hun tawp dawn lam a hmuhnawm a, Real attack a pui thei khawp mai. Karim Benzema chuan goal a khung a, hun tawp dawn tak takah Ronaldo chuan chakna goal a khung.

Real Madrid hi Champions League-a champion ngun ber an ni a, Champions League season opening match-ah, an home-a an khelh chuan chak loh an la nei lova, match 41 an chak a, match 2 chiah draw an nei a, chak lo zawk an la ni miah lo. Kum 50 chhung chu hetiang record hi an nei ta a ni.

German club Borussia Dortmund chuan 1-0 in Dutch club tha Ajax an hneh a. Dortmund star Mats hammels chuan penalty a pet goal lova, mahse striker Robert Lewandowski chuan chakna goal a khung.