East Bengal leh Shree Cement buaina chin fel a la ni lo

ISL club East Bengal leh an investor Shree Cement inkara buaina chuan kiam lam a la pan thei lo a, ISL enkawltu Football Sports Development Limited (FSDL) chuan an buaina hi ching fel thuai turin a ti.

Sports journalist Archiman Bhaduri tarlan danin nimin khan FSDL hian ISL club te meeting a neih pui a, East Bengal leh Shree Cement hian an buaina hi an ching fel vat thei lo a nih chuan season tharah an tel lo a ISL khelh mai a tul tur thu an hrilh.

Tarlan tawh angin nikum July thla khan East Bengal hi anmahni sponsor tu Quess Corp an inhnuhdawh avang leh ISL khelh ngei an duh avangin September 2020 atang khan Shree Cement hi investor niin 76% neitu nihna an nei mek a, a bak zawng hi club in an chang.

An inrem tirh hian inrem lailawk nan ‘term sheet’ ziah a ni a, tunah hian ‘final agreement’ ziah la hmabak niin hetah tak hian buaina a awm tan ta a ni. East Bengal club official te sawi danin ‘term sheet’ an lo ziah tawh leh tun a ‘final agreement’ an ziah tur hi a danglam hle niin an sawi a, an pawm thei lo a ni. Hei bakah hian Shree Cement hotupa Hari Mohan Bangur chu hemi chungchang sawipui an tumin an hmu thei lo zel niin an sawi bawk.

Shree Cement lam erawhin hei hi an pha ve thung a, danglamna a awm loh bakah danglamna awm te chu club hruaitute hi sawi turin an ti fo a, chiang takin an sawi thei lo niin an sawi ve thung a, Hari Mohan Bangur hian East Bengal – in an inremna an pawm hunah chauh an club official te hi a hmu dawn niin an sawi.

Commercial contract leh corporate lama mithiam Aditya Shamlal chuan ‘term sheet’ leh ‘final agreement’ ah hian thil danglam a awm thei niin a sawi a, “Term sheet hi chu document tlem a zawng, inrem lailawkna kha a ni mai a. Final agreement – ah chuan engkim chiang tak a ziah a ngaih tawh avangin term sheet a tel lo tam tak belh a ngai tawh thin,” tiin a sawi.

Indian football transfer bazar hi June ni 9 atang khan hawn a ni tawh a, club tam tak an bazar chur chur tawh laiin East Bengal hi anmahni pawisa petu ber Shree Cement nen an la inrem theih miau loh avangin bazar lam a la lang meuh lo a, an player tam zawk free agent an ni mek bawk.