East Bengal tan ISL a hnai ?

An hmelma lian ber Mohun Bagan – in ATK zawma Indian Super League an khelh dawn takah chuan Kolkata club lian East Bengal pawhin tih tak zetin ISL khelh an tum niin a lang.

Phai lam media thenkhat tarlan danin East Bengal club hruaitu zing a mi Dababrata Sarkar chuan,“ISL hi kan la khel ngei dawn tih ka sawi chiang ngam, chu mi chin chauh chu ka la sawi ang,” tiin PTI a hrilh niin tarlan a ni.

Twitter – lamah pawh Bengaluru FC CEO Parth Jindal chuan East Bengal hi ISL khel ve tur a sawmin,” Tunah chuan nangni chiah hi a tel lo in ni tawh e,” a ti hial a ni.

Tun dinhmuna East Bengal harsatna lian ber chu sum leh pai niin a lang a, season hnih chhung anmahni lo sponsor tawh tu Quess Corp an inhnuhdawh tak avangin sum hlawm lian a sponsor theitu tur an zawng mek niin sawi a ni a, an duh ang an hmu thei a nih chuan ISL – ah an hmel kan hmuh ngei a rinawm hle.